30-تامىز كۇنى سولتۇستىك وبلىستاردا ۇسىك جۇرەدى
قازاقستان اۋماعىنىڭ باسىم بولىگىنە اتموسفەرالىق فرونتتار اسەر ەتەدى. سونىڭ سالدارىنان نايزاعاي ويناپ، جاڭبىر جاۋادى. سولتۇستىك پەن شىعىستا قاتتى جاڭبىر جاۋادى، جەل كۇشەيەدى. وڭتۇستىكتە شاڭدى داۋىل سوعادى. سونىمەن بىرگە، سولتۇستىكتە، ورتالىقتا، شىعىستا، وڭتۇستىك- باتىستىڭ تاۋلى اۋداندارىندا بۇرشاق جاۋادى.
تەك ەلىمىزدىڭ باتىسى، سولتۇستىك- باتىسى جانە قيىر سولتۇستىگىندە انتيتسيكلون اسەرىنەن جاۋىن- شاشىن جاۋمايدى. اقمولا وبلىسىنىڭ ورتالىعى، وڭتۇستىگى مەن شىعىسىندا نايزاعاي جارقىلداپ، بۇرشاق جاۋادى. نايزاعاي كەزىندە جەل جىلدامدىعى 15-20 م/س جەتەدى. ءوڭىردىڭ سولتۇستىگىندە تۇمان تۇسەدى.
پاۆلودار وبلىسىنىڭ ورتالىعىندا، وڭتۇستىك- شىعىسى مەن شىعىسىندا كۇن كۇركىرەيدى. كۇندىز وبلىستىڭ شىعىسىندا بۇرشاق جاۋادى. نايزاعاي كەزىندە جەل ەكپىنى 15-20 م/س دەيىن كۇشەيەدى. قاراعاندى وبلىسىنىڭ سولتۇستىگى، شىعىسى مەن ورتالىعىندا نايزاعاي وينايدى. تۇندە جانە تاڭەرتەڭ وبلىستىڭ سولتۇستىگىندە جانە ورتالىعىندا تۇمان تۇسەدى. نايزاعاي كەزىندە جەلدىڭ كۇشى 15-20 م/س بولادى.
شىعىس قازاقستان وبلىسىندا تۇندە باتىسى، سولتۇستىك- باتىسى مەن سولتۇستىگىندە، كۇندىز باسىم بولىگىندە نايزاعاي جارقىلدايدى. كۇندىز باتىس، سولتۇستىك، سولتۇستىك- باتىس جانە ورتالىعىندا بۇرشاق جاۋادى، داۋىل تۇرادى. نايزاعاي كەزىندە جەل قارقىنى - 15-20 م/س.
جامبىل وبلىسىنىڭ تاۋلى اۋداندارىندا جانە سولتۇستىك- شىعىسىندا داۋىل، بۇرشاق، كۇندىز باتىسى مەن شىعىندا شاڭدى داۋىلمەن جەلدىڭ 15-20 م/س كۇشەيۋى كۇتىلەدى.
تۇركىستان وبلىسىنىڭ تاۋلى اۋداندارىندا نايزاعاي كەزىندە جەلدىڭ كۇشى 15-20 م/س جەتەدى. تاڭەرتەڭ جانە كۇندىز قىزىلوردا وبلىسىنىڭ وڭتۇستىگى مەن وڭتۇستىك- شىعىسىندا كۇن كۇركىرەيدى. جەل ەكپىنى - 15-20 م/س. كۇندىز اقتوبە وبلىسىڭ وڭتۇستىك- شىعىسىندا سەكۋندىنا 16 مەتر جىلدامدىقپەن جەل سوعادى.
قوستاناي وبلىسىنىڭ سولتۇستىگىندە، سولتۇستىك قازاقستان وبلىسىنىڭ سولتۇستىگى مەن باتىسىندا تۇندە توپىراق بەتىندە 2 گرادۋس ۇسىك جۇرەدى. تۇندە جانە تاڭەرتەڭ قوستاناي وبلىسىنىڭ سولتۇستىگىندە تۇمان تۇسەدى. ماڭعىستاۋ، اتىراۋ، باتىس قازاقستان، اقتوبە، تۇركىستان، جامبىل وبلىستارىندا، قىزىلوردا، قوستاناي، الماتى وبلىستارىنىڭ باسىم بولىگىندە، قاراعاندى وبلىسىنىڭ كەي جەرلەرىندە، شىعىس قازاقستان وبلىسىنىڭ وڭتۇستىگىندە، اقمولا وبلىسىنىڭ باتىسىندا، پاۆلودار وبلىسىنىڭ ورتالىعىندا توتەنشە ءورت قاۋپى ساقتالادى.