جامبىلدا جىل باسىنان بەرى 30 دان استام ادامدى كەنە شاققان
تاراز. قازاقپارات - جامبىل وبلىسىندا جىل باسىنان بەرى كەنەنىڭ شاعۋىنان زارداپ شەككەن 34 ادام مەديتسينالىق كومەككە جۇگىنگەن، - دەپ حابارلايدى قازاقپارات ءتىلشىسى.
كۇننىڭ ىسۋىمەن بىرگە كونگو- قىرىم گەمورراگيالىق قىزباسى اۋرۋىنىڭ تۋىنداۋىنا سەبەپ بولاتىن كەنەلەر ۇيقىدان ويانىپ، اشىق اسپان استىندا، تابيعات اياسىندا جۇرگەن ادامدارعا شابۋىل جاساي باستايدى. كونگو- قىرىم گەمورراگيالىق قىزباسى - جەدەل ۆيرۋستىق تابيعي وشاقتىق اۋرۋ، ول يكسود كەنەلەرى ارقىلى بەرىلەدى. جالپى، جامبىل وبلىستىق دەنساۋلىق ساقتاۋ باسقارماسىنىڭ مالىمەتىنشە، وڭىردە 48 ەلدى مەكەن قىرىم قاندى بەزگەگىنىڭ تابيعي وشاعى بولىپ ەسەپتەلەدى.
جىل باسىنان بەرى ۋلى جاندىكتىڭ شاعۋىنان زارداپ شەككەن 34 ادام مەديتسينالىق كومەككە جۇگىنگەن. ونىڭ ىشىندە 15 ءى - بالالار، بۇل وتكەن جىلدىڭ سايكەس كەزەڭىمەن سالىستىرعاندا 2 ەسە از. ناقتىراق، ايتساق، تاراز قالاسىنىڭ اۋماعىندا – 11، بايزاق اۋدانىندا – 10، جامبىل، قورداي، مەركى، ت. رىسقۇلوۆ جانە شۋ اۋداندارىندا ەكى جاعدايدان، مويىنقۇم جانە سارىسۋ اۋداندارىندا ءبىر جاعدايدان انىقتالعان.
«كەنە شاعۋدان زارداپ شەككەندەردىڭ بارلىعى 14 كۇنگە مەديتسينالىق باقىلاۋعا الىندى، مەرزىمى وتكەننەن كەيىن 17 ادام باقىلاۋدان الىندى. بيىل كونگو- قىرىم گەمورراگيالىق قىزباسىن راستايتىن جاعدايلار تىركەلگەن جوق. اۋرۋدىڭ دەڭگەيىن تومەندەتۋ، ەپيدەميالىق احۋالدى كۇردەلەندىرمەۋ، دەرتتى دەر كەزىندە انىقتاپ، قاتەرلى جاعدايعا جىبەرمەي ۇستاپ تۇرۋ شارالارىن جۇرگىزۋ - تەك قانا مەديتسينا، ۆەتەريناريا قىزمەتكەرلەرىنىڭ نەمەسە جەرگىلىكتى اكىمشىلىكتەردىڭ جۇمىستارى عانا ەمەس، وعان وشاق ايماقتارىندا تۇراتىن ەلدى مەكەندەردىڭ تۇرعىندارى دا ات سالىسۋعا ءتيىس» دەلىنگەن دەنساۋلىق ساقتاۋ باسقارماسى باسپا ءسوز قىزمەتىنىڭ حابارلاماسىندا.
