تاۋەلسىزدىكتىڭ 30 جىلدىعىنا ارنالعان تاريحي رومان جارىق كوردى
جازۋشى يمانعازى نۇراحمەت ۇلىنىڭ «وت پەن سۋ» رومان-ەپوپەياسىنىڭ ءبىرىنشى كىتابىنا تاريحي تولاعاي تۇلعا، ۇلى عۇن يمپەرياسىنىڭ شاڭىراعىن كوتەرىپ، كەمەلىنە كەلتىرگەن ايگىلى ءامىرشى مودە تۇمەن ۇلىنىڭ بالالىق شاعىندا باستان كەشكەن وقيعالارى ارقاۋ بولعان.
جاس ءوسپىرىم مودەنىڭ ءماجبۇرلى تۇردە ءجۇز ۇلىسىنا اماناتقا بارۋى، ساندەبىل قالاسىنداعى ءومىرى جانە جات جەردەگى جان اۋىرتار احۋالدان قالاي ازات بولعانى، عۇندار مەن جۇزدەردىڭ بيلەۋشى توپتارى اراسىنداعى تارتىس- تايتالاس اسەرلى، كوركەم تىلمەن سۋرەتتەلگەن.
سونىمەن قاتار، شىعارمادا كونە تۇركىلەردىڭ ەتنوگرافياسى مەن سالت- داستۇرلەرى، نانىم- سەنىمدەرى تۋرالى دا قىزىقتى ماعلۇماتتار بەرىلەدى. كەيىپكەرلەردىڭ دارالىعى، سان الۋان كۇردەلى وقيعالاردىڭ ۇعىنىقتى دا جەڭىل باياندالۋى، اڭگىمە بولىپ وتىرعان داۋىردەگى الەۋمەتتىك تارتىس وقىرمانداردى بەيتاراپ قالدىرمايدى.
اۆتوردىڭ ءوزى بۇل كىتاپتى ۇلى عۇن مەملەكەتىنىڭ 2230 -جىلدىعى مەن قازاقستان رەسپۋبليكاسى تاۋەلسىزدىگىنىڭ 30 جىلدىعىنا ارناعان ەكەن.
يمانعازى نۇراحمەت ۇلى - اقىن، جازۋشى. 1966 -جىلى قىتايدا دۇنيەگە كەلگەن. «توپىراققا تۇسكەن ساۋلەلەر» جىر جيناعىنىڭ، «شاشى ورتەنىپ تۇراتىن قىز»، «قايىرشىلار قاقتىعىسى»، «باقسىنىڭ كۇلكىسى» اڭگىمەلەر جيناقتارىنىڭ اۆتورى.
qazaquni.kz
