اكەسى ۇلىن 30 جىلدان سوڭ گازەتتەگى ماقالا ارقاسىندا تاۋىپ الدى
تۋىستارى «كۇت مەنى» باعدارلاماسىنا جۇگىنىپ، بالالار ۇيىنەن دە ىزدەگەن، ءبىراق ناتيجە بولماعان. قازاقستاندىق گازەتتىڭ ءۇزىندىسى ارقاسىندا وتباسى قايتا قاۋىشتى، - دەپ حابارلايدى diapazon.kz.
پورتال مالىمەتىنشە، اقتوبەلىك ەرىكتى جولداس بەلوكوسوۆ تامدى بالالار ۇيىندە ءوسىپ، كەيىن جايساڭدا تاربيەلەنگەن. ول ءبىر جاسقا تولعاندا، وتباسى اجىراسىپ، اناسى جولداستى الىپ كەتىپ، تەگىن وزگەرتىپ تاستاعان.
«انامدى بىرنەشە جىل كورمەدىم. اكەم قايتىس بولدى دەدى. تۋىستارىمدى ىزدەۋگە تىرىسپادىم. ولار مەنى كەرەك قىلماسا، ماسىل بولمايىن دەدىم. نەگە ەكەنىن بىلمەيمىن، سوڭعى جىلدارى اتامدى كورگىم كەلدى»، - دەيدى جولداس.
اكەسىنىڭ تۋىستارى جولداستى سوڭعى رەت 90-جىلدارى كورگەن. ولار جولداستى 30 جىلدان اسا ۋاقىت ىزدەگەن بولىپ شىقتى. جۋىردا اكەسى كەزدەيسوق بىلتىر قاراشادا شىققان «دياپازون» گازەتىنىڭ ماقالاسىن تاۋىپ العان.
«جولداستىڭ اكەسى كوشەدەن ءبىر گازەت تاۋىپ العان، ول سونداي ادام، ۇنەمى وقىپ جۇرەدى. وندا «جولداس بەلوكوسوۆ پەن ەۆگەني لازارچۋك» دەپ جازىلىپ تۇرعان. ول تەكسەرۋدى سۇرادى. ءبىز ينتەرنەتتەن ىزدەي باستادىق، ءسويتىپ ەۆگەني لازارچۋكتىڭ ءنومىرىن تاپتىق. وعان حابارلاسىپ، جولداس تۋرالى سۇرادىق، اكەسىنىڭ ەسىمى كەلىپ تۇر.
اكەمىز ءاردايىم ونى كورگىسى كەلەتىن، ونى تابۋىمىزدى سۇرايتىن. مەن بارلىق بالالار ءۇيىن قاراپ شىقتىم. ون جىل بويى جايساڭداعى كوللەدجگە بارىپ، تەكسەردىم، ءجىتى قاراپ ءجۇردىم. ءبىراق ءبىز ءوز تەگىمىزبەن - ءابدڭراحمانوۆ دەپ ىزدەدىك. اناسى ونى شەتەلگە، رەسەيگە الىپ كەتتى دەپ ويلادىق. «كۇت مەنى» باعدارلاماسىنا باردىم، ول جاقتان ەشقانداي حابار بولعان جوق»، - دەيدى جولداستىڭ اپكەسى بالزيپا ءابدىراحمانوۆا.
اكەسى مەن ۇلىنىڭ كەزدەسۋى وتە اسەرلى بولدى. جولداس بۇل كۇتپەگەن وقيعا ەكەنىن ايتتى.
«مەن ەشكىمگە كەرەك ەمەس، قىزىق ەمەسپىن دەپ ويلادىم. وتباسىم ۇلكەن ەكەنىنە ءالى ۇيرەنبەدىم. جاقىندا عانا كىشكەنتاي كەزىمنەن بىردە-ءبىر سۋرەت جوق ەكەنىن ايتىپ ەدىم. سول كەزدە اپكەم التى ايلىعىمدا تۇسكەن سۋرەتىمدى جىبەردى. اكەم ءتىرى ەكەنىنە قۋانىشتىمىن. تاعدىر وسىلاي بولعانىنا وكىنبەيمىن. ەڭسەم تۇسكەن جوق، تەك پوزيتيۆ كوڭىل-كۇيدە بولاتىنمىن»، - دەيدى جولداس.
ەندى جولداستىڭ ۇلكەن وتباسى، كوپتەگەن تۋىسى بار.