ۋحاندا 30 دان استام روبوت دارىگەرلەرگە جاردەمدەسىپ ءجۇر
روبوتتاردى شاڭحايدىڭ TMiRob كومپانياسى جاساپ شىعارعان. ۇيىمنىڭ باس ديرەكتورىنىڭ ايتۋىنشا، روبوتتار اق ءتۇستى، ولاردىڭ باسىنا سۋتەگى اسقىن توتىعى تولتىرىلعان جانە روبوتتىڭ ىشىندە توعىز ۋلتراكۇلگىن لامپاسى ورناتىلعان. وسى قۇرالدارى ارقىلى روبوتتار ءارتۇرلى دەزينفەكسيانى جۇرگىزە الادى.
سونىمەن بىرگە كەدەرگىلەرمەن سوقتىعىسپاۋىن قامتاماسىز ەتەتىن ارنايى تەحنولوگيالارمەن جابدىقتالعان. روبوتتار دەزينفەكتسيالىق جۇمىستاردى تاۋلىك بويى وقشاۋلاۋ بولىمدەرىندە، رەانيماتسيا بولىمشەلەرىندە، ۋحانداعى كوروناۆيرۋسقا قارسى ءىرى اۋرۋحانالارىنىڭ بولمەلەرى مەن امبۋلاتوريالارىندا ورىندايدى.
بۇعان دەيىن قىتايدا مەديتسينا قىزمەتكەرلەرىنىڭ ورنىنا كوروناۆيرۋس جۇقتىرۋ قاۋپى بار ناۋقاستاردى تەكسەرەتىن روبوت قۇراستىرۋ جۇمىستارى باستالعانىن حابارلاعان بولاتىنبىز. ايتا كەتسەك، كوروناۆيرۋستى جۇقتىرعان- جۇقتىرماعانىن تەكسەرۋ بارىسىندا ادەتتە پاتسيەنتتىڭ اۋىز قۋىسىنان ساراپتاما جيناۋ ءۇشىن تامپون قولدانىلادى. سوندىقتان مەدبيكەلەردىڭ ۆيرۋستى جۇقتىرىپ الۋ قاۋپى جوعارى. اۋدارعان: د. دوسپان
www.24.kz
