كاسىپقوي قازاق بوكسشىسى 30 رەت جەڭىسكە جەتكەن نوكاۋتشىمەن ايقاسادى

نۇر- سۇلتان. قازاقپارات - جارتىلاي ورتا سالماق ساناتىندا ونەر كورسەتەتىن كاسىپقوي قازاق بوكسشىسى نۇرسۇلتان جاڭابايەۆتىڭ (8-0، 5 ك و) كەلەسى كەزدەسۋى قاشان وتەتىندىگى بەلگىلى بولدى، دەپ حابارلايدى قازاقپارات Sports.kz-كە سىلتەمە جاساپ.

بۇرىن-سوڭدى جەڭىلىپ كورمەگەن 27 جاستاعى بىلعارى قولعاپ شەبەرى 21 -جەلتوقسان كۇنى رەسەيدىڭ كراسنويارسك قالاسىندا رينگكە شىعادى. قارسىلاسى - 38 جاستاعى تاجىريبەلى ۆەنەسۋەلالىق ەرنەستو ەسپانا (30-2-1، 25 ك و). جەكپە-جەك ون راۋندقا ەسەپتەلگەن.

سول كۇنگى بوكس كەشىندە تاعى ءبىر قازاقستاندىق بوكسشى، سۋپەرورتا سالماق وكىلى ايدوس ەربوسىن ۇلى (12-0، 8 ك و) دا كەزەكتى ايقاسىن وتكىزەدى. ونىڭ قارسىلاسى ازىرگە بەلگىسىز. شوۋدىڭ باستى جەكپە-جەگى رەسەيلىك دەنيس لەبيەۆ (32-2، 23 ك و) پەن وڭتۇستىك افريكا رەسپۋبليكاسىنان كەلەتىن تابيسو مچۋنۋدىڭ (21-5، 13 ك و) ايقاسى بولماق. ولار ءبىرىنشى ورتا سالماقتا بوس تۇرعان WBC Silver بەلبەۋىنە تالاسادى.

ەسكە سالا كەتەيىك، سوڭعى رەت جاڭابايەۆ پەن ەربوسىن ۇلى 14 تامىزدا سيدنەي قالاسىندا (اۋستراليا) جەكپە- جەك وتكىزگەن. سول كەزدە ايدوس تورەشىلەردىڭ ءبىراۋىزدان قابىلداعان شەشىمىمەن جەرگىلىكتى روككي يەركيچتى (17-2، 13 ك و) جەڭىپ، WBO Global، WBA International جانە WBC Asia Continental قورعاپ قالعان بولاتىن.

نۇرسۇلتان دا تورەشىلەردىڭ ءبىراۋىزدان قابىلداعان شەشىمىمەن اۋستراليالىق ستيۆ گاگونى (11-1، 4 ك و) جەڭىپ، WBA Inter- Continental، WBO Oriental جانە IBF Pan Pacific تيتۋلدارىن بىرىكتىردى.