دارىگەرلەر مەن مەدبيكەلەردىڭ جالاقىسى 30 پايىزعا دەيىن كوتەرىلەدى - مينيستر

بۇل تۋرالى شىمكەنتكە ارنايى ساپارمەن كەلگەن ەلىمىزدىڭ دەنساۋلىق ساقتاۋ ءمينيسترى ەلجان ءبىرتانوۆ ءمالىم ەتتى، دەپ حابارلايدى قازاقپارات ءتىلشىسى.

دەنساۋلىق ساقتاۋ ءمينيسترىنىڭ سوزىنشە، ەلىمىزدە مەديتسينا سالاسىنا بولىنەتىن قاراجات كولەمى ارتادى. ماسەلەن، بيىل بۇل سالاعا 1,2 تريلليون تەڭگە بولىنسە، كەلەر جىلى بۇل قاراجات كولەمى 1,5 تريلليون تەڭگەنى قۇرايدى. سول قاراجاتتار ەسەبىنەن دارىگەرلەر مەن مەدبيكەلەردىڭ جالاقىسى وسەدى. شىمكەنت قالاسىنداعى ساپارى كەزىندە پەريناتالدىق ورتالىقتىڭ جۇمىسىمەن تانىسقان مينيستر باس دارىگەرگە مامان تاپشىلىعىن جويۋ ءۇشىن، دارىگەرلەردىڭ جالاقىسىن كوتەرۋدى ۇسىندى.

«دارىگەر- رەانيماتولوگتىڭ جالاقىسى 300 مىڭ بولسا، بۇل سومانى 600 مىڭعا دەيىن كوتەرىڭىز. قاجەتسىز شىعىنداردى ازايتىڭىز. سول قاراجاتتى جەتىسپەي جاتقان ماماندارعا تولەڭىز. دارىگەر- رەانيماتولوگتاردىڭ جالاقىسىن 500-600 مىڭعا دەيىن جەتكىزۋ كەرەك»، - دەدى ەلجان ءبىرتانوۆ.

مينيستر سونداي-اق، انا مەن بالا دەنساۋلىعىن نىعايتۋعا ارنالعان ءبىرقاتار شارانىڭ بارىسىنا توقتالدى.

ەلجان ءبىرتانوۆ پەرزەنتحانا باسشىلىعىنا ەمدەۋ بارىسىنداعى جوسپارلاردىڭ ورىندالۋ بارىسىن قاداعالاۋدى قاتاڭ تاپسىردى.

ايتا كەتەيىك، قالالىق پەريناتالدىق ورتالىقتا جىلىنا ورتاشا ەسەپپەن 8 مىڭعا تارتا ءسابي دۇنيە ەسىگىن اشادى. بۇل پەرزەنتحانادا كوبىنە مەرزىمىنەن بۇرىن شاقالاقتار دۇنيەگە كەلەدى. بۇگىندە مەديتسينالىق ۇيىمدا 400 دەن اسا مەديتسينالىق قىزمەتكەر جۇمىس اتقارادى. مينيستر ساپارى بارىسىندا قالاداعى كاريولوگيالىق ورتالىق پەن ونكولوگيالىق اۋرۋحاناعا دا بارىپ، دارىگەرلەرمەن كەزدەستى.

ەركىن فورماتتا وتكەن كەزدەسۋدە ەلجان ءبىرتانوۆ دارىگەرلەردىڭ جۇمىسى ونسىز دا اۋىر ەكەنىن، ولاردىڭ جۇمىسىنا دەگەن كوزقاراستى وزگەرتۋ كەرەكتىگىن اتاپ ءوتتى.

قالا باسشىلىعىنا كوپسالالى اۋرۋحانا اشۋ قاجەتتىگىن اتاپ ءوتتى. ناۋقاستارعا العاشقى كومەك كورسەتۋگە بارلىق ەمدەۋ مەكەمەلەرى جۇمىلىپ جۇمىس ىستەۋ قاجەتتىگىن ەسكەرتتى.

اۆتور: اينۇر اقبايەۆا