سوڭعى 30 جىلدا بولماعان سۇراپىل داۋىل ا ق ش- قا جاقىنداپ قالدى

 استانا. قازاقپارات - وڭتۇستىك جانە سولتۇستىك كاروليناعا «فلورەنس» اتتى الاپات داۋىل جاقىنداپ كەلەدى.

قاۋىپتى ايماقتا توتەنشە جاعداي جاريالانىپ، 187 ميل قاشىقتىقتاعى جاعالاۋ ايماعىندا ەۆاكۋاتسيا جۇرگىزىلىپ جاتىر، دەپ حابارلايدى قازاقپارات bbc.com سايتىنا سىلتەمە جاساپ.

«فلورەنس» سوڭعى ونجىلدىقتاعى ەڭ سۇراپىل داۋىل بولۋى مۇمكىن دەگەن قاۋىپ بار.

ميلليون ادامدى، سونىڭ ىشىندە تۇرعىنداردى، قىزمەتشىلەر مەن تۋريستەردى ەۆاكۋاتسيالاۋ قاجەت. داۋىلدىڭ كۇشى بەس بالدىق شكالا بويىنشا ءتورت بالمەن باعالانۋدا.

«فلورەنس» وسى وڭىردە سوڭعى 30 جىلدا بولماعان اسا قاۋىپتى داۋىل بولۋى مۇمكىن.

مۇنداي كۇشتەگى داۋىل بۇل وڭىردە سوڭعى رەت 1989-جىلى بولعان ەدى. ءتورتىنشى دارەجەگە جەتكەن «حيۋگو» داۋىلى سولتۇستىك كارولينانى ويرانداپ، 7 ميلليارد دوللار زالال كەلتىرگەن. 49 ادام داۋىلدىڭ قۇربانى بولدى.

تاعى ءبىر كەزەڭسىز جاعداي، بۇعان قوسا جاعالاۋداعى جانە ىشكى وڭىرلەرگە تولاسسىز جاڭبىر جاۋىپ، سۋ تاسقىنى بولۋى مۇمكىن.