ارالدىق زەرگەر 30 جىلدان بەرى ەر-تۇرمان جاساۋمەن اينالىسادى
ونىڭ قولىنان شىققان بۇيىمدار بۇگىندە ەلىمىزدىڭ كوپتەگەن مۇراجايلارىندا ساقتاۋلى. سونىمەن بىرگە شەتەلدەرگە شىعارىلعان جادىگەرلەر دە از ەمەس. اتاعى ەلىمىزگە كەڭىنەن تانىمال زەرگەر جايىندا قازاقپارات ءتىلشىسى تارقاتىپ ايتادى.
قۇدايبەرگەن تاعجان ۇلى 1954-جىلدىڭ 1- اقپانىندا ارال قالاسىندا دۇنيەگە كەلگەن. ءبىر قىزىقتى جايت، ول ون سەگىز قىزدان كەيىن دۇنيە ەسىگەن اشىپتى. اكەسى ۇياباسار قۇدايبەرگەننەن كوپ ءۇمىت كۇتكەن. ءوزى دە سىر ەلىنە بەلگىلى اتاقتى ۇستا بولىپتى. وتىز جىلدان استام ۋاقىت بويىنا ءتۇرلى دەڭگەيدەگى كورمەلەرگە قاتىسقان ۇستا العاش كورمەسىن سەگىزىنشى سىنىپتا وقىپ جۇرگەندە ۇيىمداستىرعان ەكەن.
قۇدايبەرگەن - قىلقالام شەبەرى، ءارى سازدان ءمۇسىن جاسايدى، اعاشتان دا ويۋ ويادى. قولدانبالى ونەرمەن وتىز جىلعا جۋىق اينالىسىپ كەلەدى. ونىڭ قولىنان شىققان القا، ساۋكەلە، قۇسمۇرىن جۇزىك، قاپسىرما بىلەزىك، قارسى ىلگەك شاشباۋ، تۇمارشا، سىرعا سىندى بۇيىمدار قىز-كەلىنشەكتەر ءۇشىن تاپتىرماس اشەكەيلەر. ۇستا سۇيەكپەن ورنەكتەلگەن دومبىرا، شاقشا، كادەسىي رەتىندە قىلىش، قانجار دا جاسايدى. قازاناتقا ەر-تۇرمان دەيسىز بە، ۇستانىڭ قولىنان كەلمەيتىن دۇنيە جوق.
«مەن سوعاتىن زەرگەرلىك بۇيىمداردىڭ كوپشىلىگى كۇمىستەن جاسالادى. قازاق حالقى ەجەلدەن-اق كۇمىسكە ەرەكشە ءمان بەرگەن. كۇمىستىڭ ادام اعزاسىنا پايداسىن بۇگىنگى عىلىم دا دالەلدەپ وتىر»، - دەيدى زەرگەر.
ءتۇرلى بايقاۋلار مەن كونكۋرستاردىڭ جەڭىمپازى اتانىپ ەجەلگى ونەردى دامىتىپ، ۇلتتىق سانانىڭ جاڭعىرۋىنا وزىندىك ۇلەس قوسىپ جۇرگەن زەرگەر- ۇستا «ەكسپو-2017» كورمەسىنە دە ءوزىنىڭ ءتۇرلى بۇيىمدارىن ۇسىندى. كوپشىلىكتىڭ ءىلتيپاتىنا بولەنىپ، جوعارى باعا الدى.
«بۇل ءبىزدىڭ ۇلتتىڭ قانىندا بار ونەر. ءبىز ونى جوعالتىپ الماي ۇرپاقتان-ۇرپاققا تابىستاۋىمىز كەرەك. ەلباسىنىڭ «رۋحاني جاڭعىرۋ» دەپ وتىرعانى دا ۇلت جادىنىڭ جاڭعىرۋى دەپ بىلەمىن. ول ءۇشىن ءبىز وتكەنىمىزدى دارىپتەپ، كەلەشەككە تانىتۋعا مىندەتتىمىز. ۇرپاق ساباقتاستىعى دەگەنىمىز سول»، - دەيدى قۇدايبەرگەن قۇلمانبەت.
اۆتور: ەلۋباي اۋەزوۆ
