وڭتۇستىك كورەيانىڭ بۇرىنعى پرەزيدەنتى 30 جىلعا سوتتالۋى مۇمكىن

 دەپ حابارلايدى Yonhap اگەنتتىگى.

 2017 -جىلدىڭ ءساۋىر ايىندا سەۋل سوتى پارا الدى، وكىلەتتىلىگىن اسىرا پايدالاندى، زاڭسىز قىسىم جاسادى جانە مەملەكەتتىك قۇپيانى جاريا ەتتى دەگەن ايىپپەن بۇرىنعى مەملەكەت باسشىسى، 66 جاستاعى پاك كىن حەنى تۇتقىنداۋ تۋرالى سانكسيا بەرگەن ەدى.

ول ءوزىنىڭ قۇربىسى جانە جاقتاسى چحۆە سۋن سيلمەن كەلىسە وتىرىپ، ءىرى وڭتۇستىك كورەيالىق كونگلومەراتتاردان، سونىڭ ىشىندە Samsung, Lotte جانە SK كومپانيالارىنان بولىسۋشىلىق جاساۋ ءۇشىن 59.2 ميلليارد ۆون (55,2 ميلليون ا ق ش دوللارى) بەرۋىن تالاپ ەتكەن.

پاك كىن حە ءوزىنىڭ قۇربىسىنا مەملەكەتتىك ىستەرگە ارالاسۋعا جول بەرگەن دەپ تە كۇدىك كەلتىرۋدە. «قۋعىنعا ۇشىراعان پرەزيدەنت» ءوز كىناسىن مويىنداعان جوق.

بۇدان بولەك، كورەيا رەسپۋبليكاسىنىڭ بۇرىنعى باسشىسى ءوز ءىسى بويىنشا جۇرگىزىلگەن سوت وتىرىسىنا قاتىسپاعان. Yonhap اگەنتتىگىنىڭ حابارلاۋىنشا، سوت قازان ايىندا ونى قاماۋدا ۇستاۋ مەرزىمىن ۇزارتقاننان كەيىن، پاك كىن حە تىڭدالىمعا قاتىسۋدان باس تارتقان.

2017 -جىلدىڭ ناۋرىزىندا كونستيتۋتسيالىق سوت يمپيچمەنتتى قولداپ، پاك كىن حەنى پرەزيدەنت لاۋازىمىنان تۇبەگەيلى بوساتتى. ول وسى ۋاقىت ىشىندە قاماۋدا بولعان ەدى.

 بۇدان بۇرىن حابارلانعانداي، سەۋل سوتى كورەيا رەسپۋبليكاسىنىڭ بۇرىنعى پرەزيدەنتى پاك كىن حەنىڭ بالا كۇنگى قۇربىسى چحۆە سۋن سيلدى جيىرما جىلعا باس بوستاندىعىنان ايىرعان ەدى.