سانيتارلىق اۆياتسيا قىزمەتى ءۇرجاردان سەمەيگە 30 رەت اۋىر حالدەگى ناۋقاستاردى جەتكىزگەن
بۇل تۋرالى اتالعان قىزمەتتىڭ جۇمىسىمەن تانىسۋ بارىسىندا ءمالىم بولدى، دەپ حابارلايدى قازاقپاراتتىڭ ءۇرجار اۋدانىنداعى ءتىلشىسى.
شىعىس قازاقستان وبلىسىنىڭ ءۇرجار اۋدانى وبلىس ورتالىعىنان 550 شاقىرىم قاشىقتا جاتىر. اپات ايتىپ كەلمەيدى. وقىس وقيعا بولا قالسا، اۋىر حالگە ۇشىراعان ادامدارعا مەديتسينالىق كومەك كەرەك بولعاندا ءار سەكۋندتىڭ قىمبات ەكەندىگى راس. وسىنداي كۇردەلى جاعدايدا ءوڭىر حالقىن مەديتسينالىق قىزمەتپەن قامتاماسىز ەتۋ سەمەي قالاسىنىڭ سانيتارلىق اۆياتسيا قىزمەتىنىڭ باستى مىندەتى بولىپ وتىر.
ايتا كەتەرلىگى، بىلتىرعى جىلى سانيتارلىق اۆياتسيا قىزمەتى ءۇرجار ورتالىق اۋداندىق اۋرۋحاناسىنان اۋىر حالدەگى پاتسيەنتتەردى وبلىس ورتالىعىنا جەتكىزۋگە 30 ۇشىرىلىم جاساعان ەكەن. ونىڭ ىشىندە 75 پايىزى جۇكتى ايەلدەرگە قاتىستى.
تاياۋدا ءۇرجارعا انەستەزيولوگ- رەانيماتولوگ دارىگەر اسەم كارىبايەۆا مەن ساناۆيتسيا قىزمەتىنىڭ فەلدشەرى نازىم ساربيەۆا ناۋقاستاردى الىپ كەتۋگە كەلدى. ولار سىرقاتتاردى تەكسەرىپ، قازىرگى جاعدايىمەن تانىسىپ، جەرگىلىكتى دارىگەرلەرمەن اقىلداستى. نازىم ساربيەۆانىڭ وسى سالادا جۇرگەنىنە 23 جىل بولعان. ال اسەم ەرقانات قىزىنىڭ جۇمىس ءوتىلى 10 جىل.
جالپى، سەمەي قالاسىنىڭ ساناۆياتسيا قىزمەتى 2014 -جىلدان باستاپ جۇمىس ىستەۋدە. مۇندا دارىگەرلەردىڭ بارلىعى دا ءوز ماماندىعىنىڭ شەبەرلەرى، قانداي جاعدايدا دا دۇرىس شەشىم قابىلداي الاتىن ماماندار. سونداي- اق، مۇندا قاجەت بولعان كەزدە قالانىڭ بارلىق دەڭگەيدەگى ەمدەۋ مەكەمەلەرىنەن بىلىكتى دارىگەرلەردى دە شاقىرتا الادى. ولاردىڭ كەزەكشىلىك كەستەسى الدىن الا بەكىتىلگەن.
اتالمىش سانيتارلىق اۆياتسيا ماماندارىنىڭ جۇمىس ناتيجەلىلىگىن ارتتىرۋ، جەتۋى قيىن جەرلەردەگى ازاماتتارعا شۇعىل مەديتسينالىق كومەك كورسەتۋ ماقساتىندا «تاراز جاڭا الەم» كومپانياسىنان ان-2 ۇشاعى بەرىلگەن. مۇندا بالالاردى، اسىرەسە، شالا تۋعان سابيلەردى الىپ جۇرۋگە قولايلى جاعداي جاسالعان، ۇشاقتا رەانيماتسيالىق ۇستەل، مەديتسينالىق قۇرالدار ۇستەلى بار.
ەكيپاج 5 ادامنان تۇرادى. 2 دارىگەر، 2 ۇشقىش، 1 اۆياتەحنيك. ان-2 ۇشاعىن باسقاراتىن تاحير ۋتەگەنوۆتىڭ 34 -جىلدىق ەڭبەك ءوتىلى بار. «بىلىكتى ۇشقىش قانداي اۋا رايى بولسا دا، اۋەگە ەركىن كوتەرىلە ءبىلۋى ءتيىس. اسىرەسە تۇندە جانە تاۋلى ايماقتاردا قيىن» دەيدى ول.
سانيتارلىق اۆياتسيا قىزمەتىنىڭ جۇمىسى اۋىر ەكەندىگى ايتپاسا دا تۇسىنىكتى. اۋا رايىنىڭ قولايسىزدىعىنا، باراتىن جەردىڭ قاشىقتىعىنا قاراماستان شاقىرتۋعا جىلدام ۇشىپ، العاشقى مەديتسينالىق كومەك كورسەتۋگە قاشاندا ساقاداي ساي.
زۋحرا نۇرجان قىزى
