مۇعالىمدەر 30 پايىزدىق ۇستەمە اقىنى وسى ايدا الادى - ب ع م

استانا. قازاقپارات - مۇعالىمدەردىڭ جالاقىسىن كوتەرۋ ءۇشىن رەسپۋبليكالىق بيۋدجەتكە وزگەرىستەر ەنگىزۋ كەرەك. وعان ءبىراز ۋاقىت كەتەدى. سوندىقتان ازىرشە جەرگىلىكتى بيۋدجەتتەردىڭ ەسەبىنەن 30 پايىزدىق ۇستەمە اقىنى تولەۋ تۋرالى شەشىم قابىلداندى،

دەپ حابارلايدى قازاقپارات ءتىلشىسى.

«بۇگىن عانا رەسپۋبليكالىق بيۋدجەت كوميسسيانىڭ وتىرىسى ءوتتى. ولار (مۇعالىمدەردىڭ جالاقىسىن 30 پايىزعا كوتەرۋ تۋرالى - اۆت.) قاۋلىنىڭ جوباسىن ماقۇلدادى. كەلەسى اپتادا ۇكىمەتتىڭ كەزەكتى وتىرىسىندا داۋىسقا سالايىن دەپ وتىرمىز. سودان كەيىن اتالعان قۇجات ايماقتارعا جىبەرىلەدى. سونىڭ نەگىزىندە جەرگىلىكتى اتقارۋشى ورگاندار مۇعالىمدەردىڭ قاڭتار ايىنداعى جالاقىسىن جاڭا جۇيە بويىنشا تولەي الادى. ءبىز ءۇشىن، ەڭ باستىسى، مۇعالىمدەر جالاقىنىڭ كوتەرىلگەنىن وسى ايدىڭ سوڭىندا كورۋى ءتيىس»، - دەدى ق ر ءبىلىم جانە عىلىم ۆيتسە- ءمينيسترى بيبىگۇل اسىلوۆا قازاقپارات تىلشىسىنە بەرگەن سۇحباتىندا.

ونىڭ ايتۋىنشا، ازىرشە 30 پايىزدىق ۇستەمە اقى جەرگىلىكتى بيۋدجەتتەردىڭ ەسەبىنەن تولەنەدى. ارتىنان رەسپۋبليكالىق بيۋدجەتتى ناقتىلاعاننان كەيىن اكىمدىكتەردىڭ بارلىق شىعىندارى وتەلەدى.

«ويتكەنى بيۋدجەتتى ناقتىلاۋعا ۇزاق ۋاقىت كەتەدى. پارلامەنتتىڭ تالقىلاۋىنان وتكىزۋ كەرەك جانە تاعىسىن تاعى. سوندىقتان ازىرشە جەرگىلىكتى بيۋدجەتتەردىڭ ەسەبىنەن كوتەرگەندى ءجون كوردىك»، - دەپ اتاپ كورسەتتى ب. اسىلوۆا.

ايتا كەتەيىك، جوسپار بويىنشا اعىمداعى جىلدىڭ 1 - قاڭتارىنان باستاپ ءبىلىم بەرۋدىڭ جاڭارتىلعان مازمۇنىنا كوشۋىنە قاراي 1 ، 2- ، 5- جانە 7- سىنىپ مۇعالىمدەرىنىڭ ايلىعى كوتەرىلەدى. ال قىركۇيەكتە 3- ، 6- جانە 8- سىنىپ ۇستازدارى ەڭبەكاقىنىڭ 30 پروتسەنتكە ارتقانىن كورە الادى. بۇدان بولەك، كەلەسى جىلى قىركۇيەك ايىندا 4- ، 9- جانە 10- سىنىپ مۇعالىمدەرىنىڭ جالاقىسى كوبەيسە، 2020 -جىلى 11-سىنىپ مۇعالىمدەرىنىڭ اقشاسى ارتادى دەگەن جوسپار بار.

اۆتور: ارمان اسقاروۆ