08:04, 09 - قاڭتار 2018 | GMT +5
شىمكەنتكە 30 جاڭا اۆتوبۋس جەتكىزىلدى
شىمكەنت. قازاقپارات - شىمكەنتكە 30 دانا جاڭا اۆتوبۋستار پارتياسى جەتكىزىلدى، دەپ حابارلايدى قازاقپارات.
«شىمكەنت Bus» كومپانياسىنىڭ جاڭا ديزاينمەن كوركەيتىلگەن اۆتوبۋستارى ەندى قالانىڭ ورتالىق بولىگىندەگى تۇرعىندارعا قىزمەت كورسەتەدى. كولىك سالاسىنىڭ وكىلدەرى قالانىڭ سىرت جاعىنداعى ايماقتاردى دا نازاردان تىس قالدىرماعان.
«قالاعا جاعىن اۋىلدارعا الەۋمەتتىك باعىتتار قاجەت. جەكە تاسىمالداۋشىلار شىعىندارىن وتەي المايدى. وسى سەبەپتى ءبىز 10 الەۋمەتتىك باعىتتى بەلگىلەدىك. بۇل باعىتتار بويىنشا جۇمىسقا بيۋدجەتتەن سۋبسيديا بولىنەدى. ءبىز ءقازىر ورتالىقتا جۇرگەن اۆتوبۋستاردى وسى باعىتتارعا جونەلتەمىز دە، جاڭا كولىكتەر قالانىڭ ورتالىعىندا جۇمىس ىستەيدى»، - دەدى جولاۋشىلار كولىگى ءبولىمىنىڭ جەتەكشىسى قۋاتجان جۇماتايەۆ.
تاعى 70 جاڭا اۆتوبۋس شىمكەنتكە قاڭتار ايىنىڭ سوڭىنا تامان جەتكىزىلەدى.
