قازاقستاندا قاراشا ايىندا مينۋس 30 گرادۋس اياز بولادى

 استانا. قازاقپارات - قىستىڭ ىزعارى قاراشانىڭ سوڭىندا سەزىلەدى. بۇل تۋرالى باسپا ءسوز ءماسليحاتىندا «قازگيدرومەت» رمك اۋا رايىنىڭ ۇزاقمەرزىمدى بولجامدار باسقارماسىنىڭ باسشىسى گۇلميرا اقىشيەۆا ءمالىم ەتتى.

«قاراشا جاۋىن- شاشىندى ءارى جەلدى، سونداي- اق تاڭعى جانە تۇنگى ساعاتتاردا تۇمان باسىپ، كوكتايعاق بولادى دەپ كۇتىلۋدە. ايدىڭ ورتا كەزىندە ەلدىڭ سولتۇستىگى، شىعىسى جانە ورتالىعىندا قار جاۋىپ، بوران سوعادى. قاراشا ايىندا سۋىتۋدىڭ ءۇش تولقىنى بايقالادى» ، - دەپ توقتالدى گ. اقىشيەۆا ورتالىق كوممۋنيكاتسيالار قىزمەتىندە. ۇزاق مەرزىمدى بولجامدارعا سايكەس، قازاقستاندا قىس ەرتە ءارى قارلى بولادى دەگەن بولجام بار. ەلىمىزدىڭ سولتۇستىك، ورتالىق، شىعىس ايماقتارىندا تۇراقتى قار قاراشانىڭ ورتاسىندا تۇسسە، وڭتۇستىك جانە باتىس ايماقتاردا جەلتوقساننىڭ ەكىنشى جارتىسىندا قار جاتاتىن بولادى.

 «قىستىڭ ىزعارىن قاراشانىڭ سوڭىندا سەزىنە باستايمىز. ول كەزدە ەلىمىزدىڭ سولتۇستىك، ورتالىق جانە شىعىس وڭىرلەرىندە اۋا تەمپەراتۋراسى تۇندە مينۋس 30 گرادۋسقا دەيىن، ال كۇندىز -15 كە دەيىن تومەندەيدى. قازاقستاننىڭ وڭتۇستىك جارتىسىندا تۇندە مينۋس 15 كە دەيىن، ول كۇندىز مينۋس 5 دەيىن سۋىتادى» ، - دەدى باسقارما باسشىسى. سينوپتيكتەردىڭ ۇزاق مەرزىمدى بولجامىنا سايكەس، جەلتوقساندا اركتيكالىق تەڭىز اۋداندارىنان سۋىق اۋا ماسساسىنىڭ ءجيى ەنۋىنەن رەسپۋبليكانىڭ شىعىس جارتىسىندا سۋىق جانە قارلى، ال باتىس جارتىسىندا جىلى اۋا ماسساسىنىڭ شىعۋىنان، جىلى (نورمادان 1°س جوعارى) جانە قارى از اۋا- رايى كۇتىلۋدە. بۇدان بولەك، 2018 -جىلعى قاڭتار ازيالىق انتيتسيكلونىنىڭ ىقپالىنان از قارلى جانە سۋىق بولادى. ەلدىڭ كوپ بولىگىندە تەمپەراتۋرالىق فون كوپجىلدىق ورتاشا ماننەن 1.. .2°س تومەن بولادى دەپ بولجانادى. تەك ءبىزدىڭ رەسپۋبليكانىڭ باتىس جانە شەتكى وڭتۇستىك ايماقتارىندا تەمپەراتۋرالىق فون نورماعا جۋىق بولادى دەپ كۇتىلۋدە. اي ىشىندەگى قار مولشەرى باتىستا، وڭتۇستىكتىڭ، وڭتۇستىك- شىعىس پەن شىعىستىڭ تاۋلى جانە تاۋ بوكتەرى اۋداندارىندا نورماعا جۋىق كۇتىلەدى.

«اقپاندا مول قار جاۋىپ، قاتتى جەل مەن بوران سوعادى. وسى رەتتە ەلىمىزدىڭ سولتۇستىك- باتىس جارتىسىندا ۋلتراپوليارلىق سۋىق اۋا ماسسالارىنىڭ ەنۋىمەن ءبىرقالىپتى ايازدى، اۋا تەمپەراتۋراسى كليماتتىق نورمادان 1.. .2°س تومەن اۋا- رايى كۇتىلۋدە، ال وڭتۇستىك- شىعىس جارتىسىندا وڭتۇستىك تسيكلونداردىڭ ءجيى شىعۋىمەن تەمپەراتۋرالىق فون كليماتتىق نورماعا جۋىق بولادى دەپ كۇتىلۋدە» ، - دەيدى ول.

كۇنتىزبەلىك كوكتەمنىڭ باستالۋى قۇبىلمالى بولادى: ناعىز قىسقى ءجيى جاۋىن- شاشىندى، قاتتى جەلدى كۇندەر كوكتەمگى جىلى جانە اشىق كۇندەرمەن الماسىپ تۇراتىن بولادى. اۋانىڭ ورتاشا تەمپەراتۋراسى ناۋرىزدا نورمادان 1°س جوعارى وڭتۇستىك- باتىستا جانە ەلدىڭ وڭتۇستىگىندە باقالادى، قالعان اۋماقتا كليماتتىق نورماعا سايكەس جۋىق بولادى. جاۋىن- شاشىن مولشەرى باتىستا، سولتۇستىكتە، شىعىس پەن وڭتۇستىك- شىعىستىڭ تاۋلى جانە تاۋ بوكتەرى اۋداندارىندا نورمادان جوعارى، قالعان ايماقتاردا نورماعا جۋىق بولادى دەپ بولجانادى.

 اۆتور: رۋسلان عابباسوۆ