شىمكەنت قالاسىنىڭ بيلىگى 30 - مامىر كۇنى جۇرتتى كوشەگە شىقپاۋعا شاقىردى
قالا اكىمدىگىنىڭ رەسمي سايتىندا: «شىمكەنت تۇرعىندارى مەن قالا قوناقتارىنىڭ نازارىنا! قۇتقارۋ قىزمەتى 30 - مامىر كۇنى شىمكەنتتە نوسەر جاڭبىر مەن ەكپىنى سەكۋندىنا 25 مەترگە جەتەتىن جەل تۇرۋى مۇمكىن دەگەن ەسكەرتۋ تاراتتى. وسىعان وراي قالا اكىمدىگى بارشاڭىزدى مۇمكىندىگىنشە كوشەگە شىقپاۋعا شاقىرادى. قاۋىپسىزدىك ساقتاۋ ءۇشىن بالالاردى دالاعا شىعارماعاندارىڭىز ءجون. سونىمەن قاتار، قوعامدىق كولىكتى قولدانعاندارىڭىز ابزال!» دەگەن حابارلاندىرۋ جازىلدى.
ايتا كەتەيىك، دۇلەي جەل كەشە وبلىس ورتالىعى مەن ءبىرقاتار اۋدان تۇرعىندارىن ءبىراز ابىگەرگە ءتۇسىردى. كوشەلەر مەن اۋلالاردا اعاشتار قۇلاپ، كولىكتەردى باسىپ قالدى. كەي ۇيلەر مەن عيماراتتاردىڭ شاتىرلارى ۇشىپ كەتتى. قالانىڭ تازالىق قىزمەتى كۇشەيتىلگەن جۇمىس تارتىبىنە كوشىرىلىپ، تازالاۋمەن بولدى.
وڭتۇستىك قازاقستان وبلىسىندا دۇلەي جەل 30-دان استام اعاشتى قۇلاتىپ، مەملەكەتتىك مەكەمەلەر مەن تۇرعىن ۇيلەردىڭ شاتىرىن ۇشىرىپ كەتتى. داۋىلدىڭ سالدارىن جويۋعا ءوڭىردىڭ توتەنشە جاعدايلار قىزمەتىنىڭ 13 مامانى مەن 2 تەحنيكاسى جانە جەرگىلىكتى كوممۋنالدىق قىزمەتتىڭ 145 قىزمەتكەرى مەن 30 تەحنيكاسى جۇمىلدىرىلدى.
وبلىستىق ت ج د باسپا ءسوز قىزمەتىنىڭ مالىمەتىنشە كەشە كۇندىزگى ساعات 14:45-تەن 16:00 ارالىعىندا وڭىردە ەكپىنى سەكۋندىنا 21 مەترگە دەيىن جەل تۇرىپ، سالدارىنان شىمكەنت قالاسى مەن بايدىبەك، ورداباسى، ارىس اۋداندارىندا عيماراتتاردىڭ شاتىرلارىن ۇشىرعان.
اۆتور: اينۇر اقبايەۆا
