جاركەنت وڭىرىندە ايەلدەردىڭ 30 پايىزى كاسىپكەرلىكپەن اينالىسادى
بيزنەس- حانىمداردىڭ فورۋمىندا ءسوز سويلەگەن پانفيلوۆ اۋدانىنىڭ اكىمى بەرداۋلەت ابدۋلدايەۆ ايەلدەردىڭ كاسىپكەرلىك قاۋىمداستىعى اۋدان ەكونوميكاسىنىڭ دامۋىنا زور ۇلەس قوسقانىن اتاپ ايتتى.
ونىڭ سوزىنە قاراعاندا، بۇگىندە اۋدانداعى كاسىپكەر ايەلدەر اۋىل شارۋاشىلىعىندا، فارماتسيەۆتيكادا، ءبىلىم سالاسىندا بەلسەندى جۇمىس جاساپ جاتىر. بيزنەس- قۇرىلىمداردىڭ سالىق تولەمدەرى اۋداندىق بيۋدجەتتىڭ %45 ىن قۇراپ وتىر، 22 مىڭ ادام جۇمىسپەن قامتىلعان. سونىمەن قاتار، قازىرگى تاڭدا جاركەنت وڭىرىندە 62 مىڭ ايەل بار، ولاردىڭ %30 ى بيزنەسپەن شۇعىلدانادى. ال پانفيلوۆ اۋدانىنىڭ ىسكەر ايەلدەر قاۋىمداستىعى مەن ىسكەر ايەلدەر كەڭەسىنىڭ فيليال باسشىسى سۋريام ءىزىموۆانىڭ ايتۋىنشا، اۋدانداعى ايەل كاسىپكەرلەر جىل وتكەن سايىن كوبەيىپ كەلەدى.
«ءبىزدىڭ ايەلدەر وسى جىلدار ىشىندە اۋدان ەكونوميكاسىنا 1,5 ميلليارد تەڭگە تابىس ءتۇسىردى، جاڭا كاسىپورىندار مەن جۇمىس ورىندارى اشىلدى. ماسەلەن ارىپتەسىمىز ماحينۇر ايۋپوۆا جاڭا ناۋبايحانا اشتى، ناۋبايحاناسى زاماناۋي تەحنيكامەن جاراقتالعان. بانۋليا رازيەۆا مەملەكەتتىك باعدارلاما ارقاسىندا مال شارۋاشىلىعىن دامىتىپ وتىر. بالشەكەر جاپىشيەۆا بيزنەسىن كەڭەيتىپ، جاڭا ءدامحانا اشتى. مۇنداي مىسالدار جەتىپ ارتىلادى»، دەدى سۋريام ءىزىموۆا. كاسىپكەر ۇلبولسىن امانبايەۆا «قورعاس» شەكارا ماڭى ىنتىماقتاستىق حالىقارالىق ورتالىعى اۋماعىندا ساۋدا جاساپ ءجۇر. ايگۇل ءالىمجان قىتايدان ينۆەستور تاۋىپ، ءجۇن وڭدەۋمەن اينالىسۋدى كوزدەپ وتىر. الماتى وبلىسى ىسكەر ايەلدەر قاۋىمداستىعىنىڭ ءتورايىمى ريمما سالىقوۆا باسشىلارىنا كاسىپكەرلىكتى قولداعاندارى ءۇشىن العىس ايتىپ، بەرداۋلەت ابدۋلدايەۆقا «25 ىزگى ءىستىڭ كەرۋەنى» ءمۇسىنىن سىيعا تارتتى.
اۆتور: سامال قابىشەۆا
