اتىراۋدا سوت 30 ينتەرنەت- ويىنحانا سايتىن جاپتى

اتىراۋ. قازاقپارات - اتىراۋدا سوت شەشىمىمەن 30 ينتەرنەت كازينو سايتىنىڭ جۇمىسى توقتاتىلدى، دەپ حابارلادى وبلىستىق سوت باسپا ءسوز قىزمەتىنەن.

«اتىراۋ قالالىق سوتى اتىراۋ قالاسى پروكۋرورىنىڭ ينتەرنەت- كازينونى زاڭسىز دەپ تانۋ تۋرالى ءوتىنىشى بويىنشا ازاماتتىق ءىس قارادى. سوت وتىرىسى بارىسىندا قازاقستاندىق پايدالانۋشىلار ەركىن كىرە الاتىن 30 سايت جۇمىس ىستەيتىنى انىقتالدى. بۇل سايتتاردا «Frank-cazino» جۇمىس ىستەيدى، مۇندا ونلاين- رەجىمىندە بىرنەشە قۇمار ويىن تۇرلەرىن («زەروسىز» جانە جاندى ديلەرمەن رۋلەتكادا ونلاين- ويىن، بلەكدجەك، پوكەر) ويناۋ جانە ۇتىس تولەۋ مۇمكىندىگى بار.

سوت شەتەلدىك بۇقارالىق اقپارات قۇرالىنىڭ «Frank-cazino»  ينتەرنەت رەسۋرسىنىڭ ءونىمىن زاڭسىز دەپ تانىپ، اتىراۋ قالاسى پروكۋرورىنىڭ ءوتىنىشىن قاناعاتتاندىردى. سوت ونى ق ر اۋماعىنا تاراتۋدى توقتاتۋعا قاۋلى ەتتى. سوت شەشىمى زاڭدى كۇشىنە ەندى»، - دەپ حابارلادى سوتتىڭ باسپا ءسوز قىزمەتىندە.