م. اپسەمەتوۆ: 30-جىلدارى قۋعىنعا ۇشىراعان قازاق بايلارى جايىنداعى مۇراعاتتى قورىقپاي جاريالاۋ كەرەك

استانا. قازاقپارات - بۇگىن ەلورداداعى ق ر ۇلتتىق مۇراعاتىندا ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنەن ارنالعان قۇجاتتار كورمەسى اشىلدى.

«سوناۋ 1980-90-جىلدارى، كەڭەس ۇكىمەتى قۇلايىن دەپ تۇرعان ساتتە ماسكەۋدەن، ك گ ب ءتوراعاسىنىڭ 5 ميلليوننان استام قۇجاتى جويۋ تۋرالى بۇيرىق كەلگەن ەدى. قۇداي ساقتاپ، سول قۇجاتتاردى امان الىپ قالدىق. سول قۇجاتتاردان قازاقتاردىڭ ساياساتىن، مۇڭ-مۇقتاجىن انىق بىلۋگە بولادى. قازىرگى ۋاقىتتا وسى مۇراعاتتا 30-جىلدارداعى ۇجىمداستىرۋ كەزىندە قۋعىنعا ۇشىراعان 30-40 مىڭ جىلقى ايداعان 100 مىڭ قازاق بايلارىنىڭ قۇجاتتارى وتە قۇپيا رەتىندە ساقتاۋلى.

ءبىراق، ونىڭ قانداي قۇپيالىعى بار؟ سونى حالىققا جاريا ەتۋ كەرەك قوي. بىرەۋلەر ستالين، بەريا ءتىرىلىپ كەلەتىندەي قورقادى. ولار تىرىلمەيدى. سوندىقتان، بۇل قۇجاتتاردى ەلگە جەتكىزۋ كەرەك، ءبىلۋ كەرەك»، - دەدى ق ر ۇلتتىق مۇراعاتىنىڭ باس ديرەكتورى مارات اپسەمەتوۆ.

سونىمەن، كورمەگە كەلۋشىلەر العاش رەت ق ر ۇلتتىق مۇراعاتى، ق ر ءى ءى م اقپاراتتىق-ساراپتامالىق ورتالىعى جانە ق ر باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپكە الۋ كوميتەتىنەن الىنعان «وتە قۇپيا» گريفىندە بولعان بىرەگەي مۇراعات قۇجاتتارىنىڭ ءتۇپ نۇسقاسىمەن تانىسۋعا مۇمكىنشىلىك الىپ وتىر.

وندا ءا. بوكەيحان، ا. بايتۇرسىنوۆ، م. دۋلاتوۆ، م. جۇمابايەۆ، س. اسپاندياروۆ، ج. ايماۋىتوۆ، س. سەيفۋللين، ءى. جانسۇگىروۆ، ب. مايلين، و. جاندوسوۆ، ت. جۇرگەنوۆ سىندى قازاق حالقىنىڭ بەلگىلى ساياسي جانە قوعام قايراتكەرلەرىنىڭ جەكە قۇجاتتارى مەن تەرگەۋ ماتەريلادارى ۇسىنىلعان.

مۇنان بولەك، قازاق جەرىنە كۇشتەپ قونىس اۋدارىلعان گرەكتەردىڭ، ليتۆالىقتاردىڭ، ەستوندىقتاردىڭ، لاتىشتاردىڭ، يراندىقتاردىق جەكە قۇجاتتارى، فرانسۋز، يسپان، جاپون، اۆستريالىق، ۆەنگريالىق اسكەري تۇتقىنداردىڭ قۇجاتتارى دا كەلۋشىلەردىڭ قىزىعۋشىلىعىن تۋدىرارى ءسوزسىز.

كورمە شامامەن ءبىر اپتاعا سوزىلادى.

اۆتور: مارلان جيەمباي