دجەك ما: الداعى 30 جىلدا ينتەرنەت الەمگە ەلەۋلى وزگەرىستەر اكەلەدى
بۇل تۋرالى بۇگىن استانا ەكونوميكالىق فورۋمىنىڭ پلەنارلىق وتىرىسىندا Alibaba Group كومپانياسىنىڭ نەگىزىن قالاۋشى جانە ديرەكتورلار كەڭەسىنىڭ ءتوراعاسى دجەك ما ءمالىم ەتتى.
«الەم وزگەردى، ياعني سوڭعى بىرنەشە جىلدا ينتەرنەت بارشا الەمدى وزگەرتتى. الداعى 30 جىلدا ينتەرنەت الەمدى بۇدان ارتىق وزگەرىسكە ۇشىراتادى. 1,8 ميلليارد ادام وتكەن عاسىردىڭ 80- جىلدارىنان كەيىن ومىرگە كەلدى. بۇگىندە ولار ينتەرنەتتىڭ بۋىنى دەپ سانالادى جانە بۇل بۋىن ۇنەمى جاڭاشىلدىقتى كۇتەدى. اتاپ ايتقاندا، ينتەرنەت الەمگە ەلەۋلى ۇلەسىن قوستى، سونىمەن قاتار كەيبىر كەرى اسەرلەرى دە بولدى. جالپى، ءبىز ەلەكتروندى جولدى قۇرۋ تۋرالى ويلادىق پا؟ ياعني، ازيا مەن ا ق ش اراسىندا، ازيا مەن ەۋروپا اراسىندا جولدى قالىپتاستىرۋدى قاراستىردىق پا؟ وسى ەلەكتروندى جۇمىس ارقىلى كەز كەلگەن شاعىن بيزنەس اقىسىز تۇردە جىلجىپ، بيزنەسىن شىعىنسىز جۇرگىزە الادى. وسى جولدا ۇيالى تەلەفونى بار ءاربىر ادام كەز كەلگەن ءونىمدى ساۋدالاۋعا قاۋقارلى بولادى. مەنىڭ ويىمشا، بۇل تۇرعىدا ويلانعان دۇرىس بولار ەدى»، - دەدى دجەك ما.
سونىمەن قاتار ول قازاقستانعا ساپارى جايىندا ءوز ويىمەن ءبولىستى.
«مەن قازاقستانعا العاش كەلىپ وتىرمىن. بۇعان دەيىن ۇشاقپەن قازاقستان ارقىلى وتكەن بولاتىنمىن، الايدا ەشقاشان وسىندا ايالداپ كورمەپپىن. استاناعا كەلگەندە ازيا مەن ورتالىق ازيانىڭ بايلانىسىن سەزىندىم. كەشە مەيرامحاناعا تاماقتانۋعا بارعاندا، قازاقستاندا ەۋروپالىقتار دا جانە ازيالىقتار دا وزدەرىن جايلى سەزىنەتىندىگىن بايقادىم»، - دەدى ول.
اۆتور: رۋسلان عابباسوۆ
