وسى جىلى 30 مىڭعا جۋىق قازاقستاندىق اسكەر قاتارىنا شاقىرىلادى

استانا. قازاقپارات - بۇگىنگى تاڭدا قازاقستاننىڭ قورعانىس ىستەرى جونىندەگى باسقارمالارىندا قارۋلى كۇشتەر، باسقا دا اسكەرلەر مەن اسكەري قۇرلىمدار ءۇشىن شاقىرىلۋشىلاردى الدىن الا زەردەلەۋ جانە ىرىكتەۋ وتكىزىلەدى، دەپ حابارلادى ق ر قورعانىس مينيسترلىگىنىڭ باسپا ءسوز قىزمەتى.

كەزەكتى شاقىرۋ ناۋقانى ءبىرىنشى ساۋىردە باستالادى. بيىلعى جىلى مەرزىمدى اسكەري قىزمەتكە 18 بەن 27 جاس ارالىعىنداعى كەيىنگە شاقىرىلۋعا قۇقىعى جوق، سونداي-اق وقۋ ورىندارىنان شىعارىلعان، جاسى 27 گە تولماعان جانە بەلگىلەنگەن مەرزىمدە شاقىرىلىم بويىنشا اسكەري قىزمەت وتكەرمەگەن 30 مىڭعا تارتا قازاقستاندىق مەرزىمدى اسكەري قىزمەتكە شاقىرىلۋعا جاتادى. شاقىرۋ جانە مەديتسينالىق كوميسسيالاردى قۇرۋ جوسپارلانۋدا.

قاجەتتى جابدىق جانە ءتيىستى ماماندارمەن قامتاماسىز ەتۋ رەتكە كەلتىرىلدى. مەديتسينالىق كوميسسيا قۇرامىنا اسكەري-دارىگەرلىك ساراپتاما ماسەلەلەرى بويىنشا دايىندىعى بار بىلىكتى دارىگەر ماماندار، ياعني، وتاشى، تەراپيەۆت، ناركولوگ، نيەۆروپاتولوگ، پسيحياتر، كوز دارىگەرى، قۇلاق-مۇرىن دارىگەرى، دەرماتوۆەنەرولوگ، ءتىس دارىگەرى كىرەدى. ءارى قاراي شاقىرۋدى ءتيىستى ءوڭىردىڭ اكىمى ورىنباسارىنىڭ باسشىلىق ەتۋىمەن شاقىرۋ كوميسسياسى جۇزەگە اسىرادى. سونداي-اق دەنساۋلىق ساقتاۋ، ءى ءى م، ءبىلىم بەرۋ، قوعامدىق ۇيىم، ۇلتتىق قاۋىپسىزدىك كوميتەتىنىڭ وكىلدەرى قاتىسادى.

جەرگىلىكتى اسكەري باسقارۋ ورگاندارى ق ر قارۋلى كۇشتەرى، ۇلتتىق ۇلان، مەملەكەتتىك كۇزەت قىزمەتى مەن شەكارا قىزمەتىنىڭ اسكەري بولىمدەرىنە شاقىرۋدى جۇزەگە اسىراتىنىن ايتا كەتەيىك. باستاپقى اسكەري دايىندىق قورىتىندىسى بويىنشا ەر-ازاماتتار اسكەري انت قابىلدايدى. ودان كەيىن اسكەري قىزمەت اتقارۋ ءۇشىن ءتيىستى لاۋازىمدارعا تاعايىنداۋ جۇرگىزىلەدى.

2015-جىلدىڭ كۇزىندە 12 مىڭ ادام شاقىرىلدى. ولاردىڭ اراسىندا 4000 شاقىرىلۋشى ق ر قارۋلى كۇشتەرىنىڭ قاتارىنا، 2000 عا جۋىق قازاقستاندىق ۇ ق ك شەكارا قىزمەتىنە، 6500 دەن اسا شاقىرىلۋشى ءى ءى م ۇلتتىق ۇلانى مەن 300 گە جۋىعى مەملەكەتتىك كۇزەت قىزمەتىنە قىزمەت ەتۋگە اتتانعانىن ەستەرىڭىزگە سالا كەتەيىك.