الماتىدا باسپانا باعاسى 30 پايىزعا ارزاندادى
بۇل تۋرالى الماتى ارناسى حابارلايدى.
الىپساتارلاردىڭ سوزىنشە، قازىر الىپ شاھارداعى باسپانا باعاسى 30 پايىزعا ارزانداعان. ءبىراق الۋشى جوق. ەسەسىنە جالدامالى پاتەرلەرگە سۇرانىس ارتىپ، ولاردىڭ قۇنى 10 پايىزعا قىمباتتاپتى.
دوللار باعامى وزگەرگەلى باسپانا باعاسىندا دا ايتارلىقتاي ايىرماشىلىق بار. الىپساتارلار الماتىنىڭ بارلىق اۋماعىندا پاتەرلەردىڭ 30 پايىزعا دەيىن ارزانداعانىن ايتادى. ماسەلەن، بۇرىن 90 مىڭ دوللار تۇراتىن ەكىنشى دەڭگەيلى ۇيدەگى ەكى بولمەلى پاتەردىڭ قۇنى قازىر 55-60 مىڭ دوللار شاماسىندا ەكەن. ءبىراق سوعان قاراماستان، ساتىپ الۋشى جوق. جىلجىمايتىن مۇلىك نارىعى ماماندارىنىڭ مالىمەتىنشە، وتكەن اقپان ايىندا ساۋدا-ساتتىق قۇلدىراعان.
ىلۋدە ءبىر كەزدەسىپ قالاتىن باسپانا الۋشىلار ۇيلەرىن نەگىزىنەن مەدەۋ مەن اۋەزوۆ اۋداندارىنان تاڭداعاندى ءجون كورەدى ەكەن. ال، جالدامالى پاتەرلەرگە دەگەن سۇرانىس بوستاندىق پەن المالى اۋداندارىندا كوپ بايقالادى.
«دوللار باعامىنان باس تارتىپ، ساۋدا-ساتتىقتى تەڭگەمەن جۇرگىزە باستاعانىمىزدا ءۇي باعاسى ءبىراز تومەندەدى. شامامەن تامىز ايىنداعى باعادان 10-15 پايىزعا تۇسكەن. ال، قۇرىلىس كومپانيالارى جاڭا ۇيلەردىڭ تەڭگەگە شاققاندا باعاسىن 3-5 پايىزعا كوتەردى»، - دەدى قازاقستان ريەلتورلار قاۋىمداستىعىنىڭ ۆيتسە-پرەزيدەنتى نينا لۋكيانەنكو.
ال، مەملەكەتتىك باعدارلامالار بويىنشا ءساۋىر ايىنىڭ سوڭىنا دەيىن 600 الماتىلىق وتباسى قونىس تويىن تويلايدى. جىل سوڭىنا دەيىن قولجەتىمدى باسپاناعا 3 مىڭ تۇرعىن قول جەتكىزەدى. وسى دەمالىس كۇندەرى الماتىدا 250 وتباسى جاڭا پاتەر كىلتىنە يە بولادى. باسپانا تۇركسىب اۋدانىنداعى «جاس قانات» ىقشام اۋدانىنان «نۇرلى جول» باعدارلاماسى ارقىلى بەرىلەدى.
«سوڭعى قۇجات قابىلداعانىمىز بويىنشا، 594 پاتەر ايتىلعانى. بىزدە «جاس وتباسى» دەگەن بار، بىلتىر قىركۇيەك ايىندا قابىلدادىق. سول بويىنشا 400 دەن اسا پاتەر كەلەدى. جوسپاردا سول بار بەرىلەتىن. مامىر ايىندا باستاۋىمىز مۇمكىن، الاتاۋ اۋدانىندا «سايالى» ىقشام اۋدانىندا بەرىلەدى»، - دەدى الماتى قالاسى تۇرعىن ءۇي جانە تۇرعىن ءۇي ينسپەكتسياسى باسقارماسىنىڭ باس مامانى ازىرەت ەسەيەۆ.
قازىر الماتى قالاسىندا ءبىرىنشى دەڭگەيلى ۇيلەردەگى 1 بولمەلى پاتەر قۇنى شارشى مەترىنە قاراي 40-45 مىڭ ا ق ش دوللارى شاماسىندا بولسا، ەكىنشى دەڭگەيلى ۇيلەردەگى 1 بولمەلى پاتەر 35 مىڭ دوللاردان باستاپ ساتىلۋدا. ساۋداگەرلەر باسپانا باعاسى بۇدان ارى ارزاندامايتىنىن، وسى قالىپتا ساقتالاتىنىن ايتادى. سەبەبى بۇرىن ۇيلەرىن قىمباتقا العاندار ونى تومەن باعادا ساتقاننان گورى جالعا بەرگەندى ءجون كورەدى ەكەن.
