قازاقستاندا قۇس ەتى ءوندىرىسى 30 پايىزعا ۇلعايدى

الماتى. قازاقپارات - قازاقستاندا سوڭعى 5 جىل ىشىندە قۇس ەتى ءوندىرىسى 30 پايىزعا ۇلعايدى.
None
None

بۇل تۋرالى بۇگىن الماتىدا قۇس وسىرۋشىلەردىڭ ءتورتىنشى قازاقستاندىق حالىقارالىق فورۋمى بارىسىندا قر اۋىل شارۋاشىلىعى ۆيتسە- ءمينيسترى گۇلميرا يسايەۆا ءمالىم ەتتى.

ونىڭ ايتۋىنشا، قازىرگى تاڭدا ەلىمىزدە جىلىنا 134 مىڭ توننا قۇس ەتى وندىرىلەدى ەكەن. «بۇل بىزگە شەت ەلدەردەن جەتكىزىلەتىن قۇس ەتىنىڭ كولەمىن ازايتۋعا مۇمكىندىك بەردى. ەگەر 2007 -جىلى ەلىمىزدە تۇتىنىلاتىن قۇس ەتى كولەمىنىڭ 70 پايىزى شەت ەلدەردەن جەتكىزىلگەن بولسا، بۇگىندە ول 55 پايىزدى قۇرايدى. بىزدە قازىر قۇس شارۋاشىلىعى سالاسىن دامىتۋ بويىنشا الداعى 7 جىلعا ارنالعان جوسپار بار. ول بويىنشا 2020 -جىلعا دەيىن قازاقستاندا قۇس ەتى ءوندىرىسىنىڭ كولەمىن جىلىنا 230-240 تونناعا جەتكىزۋ كوزدەلگەن. سوندا ىشكى نارىقتىڭ سۇرانىسىن تولىعىمەن قامتاماسىز ەتەمىز.

بۇعان ءسوزسىز قول جەتكىزەمىز. ويتكەنى، مەملەكەت تاراپىنان كورسەتىلەتىن قارجىلاي كومەك 6,8 ميلليارد تەڭگەدەن 25 ميلليارد تەڭگەگە ۇلعايتىلدى»، - دەدى گ. يسايەۆا. سونىمەن قاتار ول، قازىرگى تاڭدا ىشكى نارىقتى قۇس جۇمىرتقاسىمەن تولىق قامتاماسىز ەتۋگە قول جەتكىزىلگەنىن جەتكىزدى. «ەلىمىزدە جۇمىرتقا ءوندىرىسى سوڭعى 5 جىل ىشىندە 15 پايىزعا ءوستى. قازىرگى تاڭدا جىلىنا 4,3 ميلليارد دانا جۇمىرتقا وندىرىلەدى. ال بۇل، ىشكى نارىقتىڭ سۇرانىسىن تولىعىمەن قامتاماسىز ەتىپ وتىر. ءبىز قازىر ءتىپتى جۇمىرتقانى ەكسپورتقا شىعارا باستادىق»، - دەدى گ. يسايەۆا.

ايتا كەتەلىك، ەلىمىزگە قۇس ەتى تۇتاس جانە مۇشەلەنگەن كۇيىندە رەسەي، بەلورۋسسيا، ۋكراينا، ا ق ش جانە ءبىرقاتار ەۋروپا ەلدەرىنەن جەتكىزىلەدى. فورۋم جۇمىسى ودان ءارى جالعاسۋدا.

اۆتور: جاپپاربەرگەن ايبوتا

سوڭعى جاڭالىقتار