دامىعان 30 ەلدىڭ قاتارىنا ەنۋ ءۇشىن قازاقستاندا بارلىق مۇمكىندىك بار - ءماجىلىس دەپۋتاتى ءا. راقىمجانوۆ

استانا. قازاقپارات - ق ر پارلامەنتى ءماجىلىسى دەپۋتاتتارىنىڭ وڭىرلەرگە ساپارى اياسىندا دەپۋتات ءامىرحان راقىمجانوۆ اقتوبە وبلىسىنىڭ ايتەكە ءبي جانە ىرعىز اۋداندارىنا بولىپ، جۇرتشىلىقپەن جۇزدەستى. بۇل تۋرالى ءماجىلىستىڭ باسپا ءسوز قىزمەتىنەن حابارلاندى.

ءماجىلىس دەپۋتاتى ساپارى بارىسىندا قارابۇتاق اۋىلىنا ات باسىن بۇرىپ، ايتەكە ءبي اتىنداعى مۋزەيدە بولدى. ودان كەيىن «بالبۇلاق» بالاباقشاسىنا بارىپ، مەكتەپكە دەيىنگى ۇيىمنىڭ تىنىس- تىرشىلىگىنەن حاباردار بولدى.

مەكەمەنىڭ عيماراتى بىلتىر پايدالانۋعا بەرىلگەن. قازىر 41 بالا تاربيەلەنۋدە. ءماجىلىس دەپۋتاتى تالاپقا ساي قىزمەت جاساپ تۇرعان بالاباقشانىڭ جۇمىسىن وڭ باعالادى. ول سونداي-اق قارابۇتاق جانە ەڭبەكتۋ اۋىلىن اۋىز سۋمەن قامتاماسىز ەتىپ تۇرعان «قارابۇتاق- سۋ» كوممۋنالدىق مەملەكەتتىك كاسىپورنىنىڭ جۇمىسىمەن تانىستى.

سونىمەن قاتار، «ىرعىز- تورعاي مەملەكەتتىك رەزەرۆاتى» مەملەكەتتىك مەكەمەسىندە قىزمەتكەرلەرىمەن كەزدەستى. 2007 -جىلى قۇرىلعان مەكەمەنىڭ نەگىزگى مىندەتى - بەتپاقدالا تارالىمىنداعى كيىكتەردى قورعاۋ، ساقتاۋ جانە كوبەيتۋ جانە دۇنيەجۇزىلىك ماڭىزى بار رامسار كونۆەنتسياسى تىزىمىنە ەنگىزىلگەن سۋلى- باتپاقتى ولكەنى قورعاۋ بولىپ تابىلادى. ايتا كەتەرلىگى، مەكەمە اشىلعالى اقبوكەندەر سانى باياۋ، ءبىراق تۇراقتى ءوسىپ كەلەدى. ق ر زووينستيتۋت مالىمەتتەرى بويىنشا بەتپاقدالا تارالىمىنداعى كيىكتەردىڭ سانى 2007 -جىلى 22,8 مىڭ بولسا، 2014 -جىلى 216 مىڭعا جەتكەن.

 بۇدان بولەك، ق ر رەسپۋبليكاسى پارلامەنتى ءماجىلىسىنىڭ دەپۋتاتى ءامىرحان راحىمجانوۆتىڭ اقتوبە وبلىسىنداعى ءىسساپارى حرومتاۋ اۋدانىندا جالعاستى. دەپۋتات الدىمەن شاھارداعى جول جاعدايىمەن تانىستى. سودان سوڭ قالاداعى ءسۇت ونىمدەرىن دايىندايتىن «اگروفيرما «تاۋ» ج ش س- نە بولدى. بۇل نىساندا تاۋلىگىنە 20 توننا ءسۇت ونىمدەرى دايىندالادى.

ەندى ايران مەن سۇتتەن وزگە سۇزبە، ىرىمشىك، ماي سياقتى ءسۇت ونىمدەرىن ءوندىرۋ جوسپارلانۋدا. سەرىكتەستىك قازىر 20 ادامدى جۇمىسپەن قامتىپ وتىر. ءماجىلىس دەپۋتاتى ءا. راحىمجانوۆ سونداي- اق، جۇمىسىن ەندى باستاعان شۇجىق ونىمدەرىن دايىندايتىن جاڭا تسەحتا دا بولدى.

«تۇتاستاي العاندا، ءبىز ايماقتىڭ اۋداندارى مەن اۋىلدارىن ارالاپ، مەملەكەتتىڭ بارلىق الەۋمەتتىك باعدارلامالارىنىڭ ويداعىداي جۇزەگە اسىرىلىپ جاتقانىنا كۋا بولۋدامىز. الدىمىزدا ەلباسى ۇسىنعان «100 ناقتى قادام» باعدارلاماسىن ىسكە اسىرۋ تۇر. دامىعان 30 ەلدىڭ قاتارىنا ەنۋ ءۇشىن بىزدە بارلىق مۇمكىندىك بار»، - دەدى ءماجىلىس دەپۋتاتى تۇرعىندارمەن كەزدەسۋ بارىسىندا.

اۆتور: قانات مامەتقازى ۇلى