جاس اكتەر سەرىك ءشارىپ «باتىلدىق جەتىسپەيدى» دەگەن سىننان كەيىن 30 مەتر بيىكتەن سەكىردى - كەسكىن، فوتو
ناقتىراق ايتقاندا، جاس اكتەر بيىكتەن قورىقسا دا كينو ءۇشىن قۇزدان سەكىردى.
«قازاقستان» ۇلتتىق ارناسىنىڭ باسپا ءسوز قىزمەتىنىڭ حابارلاۋىنشا، اتالعان حيكايانى «كوركەم فيلم» كينوكومپانياسى «قازاقستان» رەسپۋبليكالىق تەلەراديوكورپوراتسياسىنىڭ تاپسىرىسى بويىنشا ءتۇسىرىپ جاتىر.
9 قاباتتى ءۇيدىڭ بيىكتىگىندەي قۇزدان سەكىرگەن اكتەر وعان دەيىن اكروفوبياعا بەيىم، ياعني بيىكتىكتەن قورقاتىن. جاڭا حيكاياداعى باستى قاھارمانداردىڭ ءبىرىن سومداۋ ءۇشىن سەرىك نە دە بولسا، ءوزىنىڭ قورقىنىشىن جەڭۋگە ارەكەت جاسادى»، دەلىنگەن حابارلامادا.
جاردىڭ شەتىندە تۇرىپ، سەرىك كورەرمەندەرگە مۇنداي قادامعا حيكايادا باستى ءرولدى سومداۋ ءۇشىن بارعانىن جاسىرماي ايتتى. ويتكەنى، سەرىك سومدايتىن كەيىپكەر مىنەزى قاتال بولۋى ءتيىس. الايدا، العاشقى ءتۇسىرىلىم كۇندەرىنەن كەيىن جاس اكتەرگە باتىلدىق پەن قاتالدىق جەتىسپەيدى دەگەن سىن ايتىلدى.
وسى كەزدە جاس جىگىت سپورتتىڭ ايرىقشا تۇرلەرىمەن اينالىساتىن كاسىبي سپورتشىلارعا جۇگىنىپ، ولاردىڭ ارنايى نۇسقاۋىنان وتكەننەن كەيىن، 30 مەتر بيىكتىكتەن سەكىرۋگە بەل بۋدى.
سەرىك ءشارىپ «قارا شاڭىراق»، «قىزدار»، «موزگوترياسى»، «حرانيتەلي سولنتسا» حيكايالارى مەن «كەشەگى ماحاببات» تولىقمەتراجدى فيلم ارقىلى كورەرمەنگە تانىس.
