مەديتسينا قىزمەتكەرى 30 ناۋقاستى ءولتىرىپ، ءومىر بويى باس بوستاندىعىنان ايىرىلدى

استانا. قازاقپارات - گەرمانيانىڭ سولتۇستىگىندە 30 ناۋقاستى ولتىرگەنىن مويىنداعان سانيتار ءومىر بويى باس بوستاندىعىنان ايىرىلدى. ول پاتسيەنتتەرگە ولىمگە اپاراتىن دارىلەردىڭ اسا كوپ دوزاسىن بەرىپ كەلگەن.

نيلس ح. اتتى 38 جاستاعى ەر ادام كىسى ءولتىردى دەگەن ايىپپەن كىنالى دەپ تانىلدى. تەرگەۋ مالىمەتتەرى بويىنشا، سانيتار ناۋقاستارعا ينەكتسيا جاساپ، سوسىن ولاردىڭ ءومىرىن ساقتاپ قالۋ ارەكەتىن جاساعان. ول وسىلايشا مەديتسينالىق قابىلەتىن جاقسارتۋعا تىرىسقان.

وتكەن اپتادا ول قىزبالىقپەن وسىنداي ارەكەتكە بارعانىن سوت بيلىگىنە ايتىپ، قۇربان بولعانداردىڭ وتباسىلارىنان كەشىرىم سۇراپتى.

ايتا كەتەيىك، ناۋقاستار ولگەن اۋرۋحانا دەلمەنحورست قالاسىندا ورنالاسقان. ال جازاعا تارتىلعان مەديتسينا قىزمەتكەرى 2003-2005-جىلدارى رەانيماتسيا بولىمىندە جۇمىس ىستەگەن.

khabar.kz