ج. بيبەر 30 جاسقا دەيىنگى ەڭ جوعارى تابىس تاباتىن اتاقتى ادامدار ءتىزىمىنىڭ باسىندا تۇر

استانا. قازاقپارات - كانادالىق ءانشى جاستين بيبەر جاسى 30 عا تولماعان ەڭ جوعارى تولەنەتىن اتاقتى ادامداردىڭ ءتىزىمىن باستادى.

بۇل دەرەك امەريكانىڭ Forbes جۋرنالىندا جاريالاندى.

باسىلىمنىڭ مالىمەتتەرى بويىنشا، وتكەن جىلدىڭ ماۋسىمىنان بيىلعى جىلدىڭ ماۋسىمىنا دەيىن بيبەر شامامەن 80 ميلليون دوللار پايدا تاپقان. Forbes جۋرنالىنىڭ مالىمەتى بويىنشا 20 جاستاعى پوپ-ورىنداۋشىعا كىرىستەرىنىڭ نەگىزگى سوماسى الەمدىك تۋرنەدەن تۇسكەن.

بۇل رەيتينگتەگى ون ورىننىڭ توعىزىندا مۋزىكانتتاردىڭ ەسىمدەرى اتالعان. ەكىنشى ورىندا بريتاندىق One Direction پوپ- توبى. ءبىر جىلدا ۇجىم 75 ميلليون دوللار پايدا تاپقان. توپتاعى مۋزىكانتتاردىڭ ورتاشا جاسى - 21.

كوش باستاعان ۇشتىكتە 24 جاستاعى امەريكالىق ورىنداۋشى تەيلور سۆيفتتىڭ ەسىمى دە بار. مۋزىكانى كانتري ستيلىندە ورىندايتىن ونىڭ كىرىسى 64 ميلليون دوللاردى قۇرادى.