تۋريستەردى 30 ميلليون تەڭگە شىعىنعا باتىرعان «گۇلنار تۋر» باسشىسى ۇشتى- كۇيلى جوعالىپ كەتتى
شىعىن ءالى تالاي وسەتىنى انىق. ويتكەنى تۋرفيرما كەسىرىنەن جولدا قالىپ، دەگەنمەن قۇزىرلى ورىندارعا شاعىمدانىپ ۇلگەرمەگەن جۇزدەگەن تۋريست بار. وتكەن اپتادا «گۇلنار تۋر» باسشىلارىنا قاتىستى پروكۋراتۋرا قىلمىستىق ءىس قوزعاعان بولاتىن. ەندى ايىپتىلار 10 جىلعا دەيىن اباقتىعا جابىلىپ، دۇنيە-مۇلكى تاركىلەنۋى مۇمكىن.
ۇكىمەتتىڭ كومەگىمەن بۇگىنگە دەيىن «گۇلنار تۋر» تەنتىرەتىپ كەتكەن 1237 تۋريست وتانعا ورالىپتى. تۇركيادا قاڭعىپ قالعان قازاقتار ءالى دە بار. قايتا الماي جاتقانداردان بولەك، جىلداعى جالعىز دەمالىسىنا «گۇلنار تۋرمەن» اتتانامىز دەگەن ەل اۋەجايدان قايتتى. جۇرت جابىلىپ ارىز جازعان سوڭ، تۋرفيرماعا قاتىستى قىلمىستىق ءىس قوزعالعان بولاتىن. وتەم اقى كولەمى مەن جاپا شەككەندەر سانى دا ءسات سايىن ارتىپ بارادى.
باۋىرجان جۇماحانوۆ، بوستاندىق اۋدانىنىڭ پروكۋرورى:
- كەلتىرىلگەن زياننىڭ مولشەرى 6 ميلليون تەڭگەدەن استاتىن بولعان، بۇگىنگى تاڭدا 30 ميلليوننان اسىپ وتىر. جانە جابىرلەنگەن تۇلعالاردىڭ سانى دا 28 دەن بۇگىنگى تاڭدا 34 كە جەتتى.
قۇزىرلى ورىندار قازىر «گۇلنار تۋردىڭ» كەڭسەلەرىن بەكىتىپ، قۇجاتتارىن تۇگەل تەكسەرۋدە. تۋريستەردى تاستاعىش تۋرفيرمانىڭ ارتىن ۇكىمەت جابۋدا قازىر. ال قايتارىلعان تۋريستەر ءۇشىن اقى تولەۋگە «گۇلنار تۋر» تاعى قاۋقارسىز. شەتەلدىك چارتەرلەر مەن وتاندىق ارىپتەستەرىنىڭ الدىنداعى قارىزى 600 ميلليون تەڭگەگە جۋىق. ەركىنسىپ ەسى كەتتى مە، الدە قىلمىستىق ءىس تۋرالى قارار تۇبىنە جەتتى مە، ايتەۋىر، تۋريستىك كومپانيا باسشىسى ءالي يسمايلوۆ قازىر ۇشتى-كۇيلى جوق. قۇزىرلى ورىندار ونى تاپپاي جاتىر.
مارات يعاليەۆ، ق ر يندۋستريا جانە جاڭا تەحنولوگيالار مينيسترلىگى تۋريزم كوميتەتىنىڭ ءتوراعاسى:
- «گۇلنار تۋردىڭ» باسشىسىمەن سويلەستىم. قازىر مەندە قيىندىق بولىپ جاتىر. سوندىقتان بانكتەردەن نەسيە السام دەدى. باسشىسى ەندى حابارسىز كەتتى. جانىنداعى ادامدار بىلمەيدى، قايدا ەكەنىن. سوندىقتان، ءبىز ونى كۇتىپ وتىرمىز، بايلانىسقا شىعا ما، شىقپاي ما، سوسىن كورەمىز نە ىستەيتىنىن.
«گۇلنار تۋردىڭ» ليتسەنزياسىنىڭ تاعدىرى جاقىن كۇندەرى شەشىلمەك، سوت سوڭعى ۇكىمدى ايتادى. ال ەلىمىزدەگى تۋريستىك سالانىڭ تورتتەن ءبىرىن قولىندا ۇستاپ وتىرعان كومپانيا بانكروت بولسا، بۇل وتاندىق ءتۋريزمنىڭ ابىرويىن ايرانداي توگە مە دەپ قاۋىپتەنەدى ساراپشىلار.
- «گۇلنار تۋر» وزدەرىن بانكروتپىز دەپ جاريالاسا دا جاۋاپكەرشىلىكتەن جالتارا المايدى. قارىزدارىن قايتارۋ ءۇشىن مۇلىكتەرى تۇگەل ساۋداعا تۇسپەك. باسىنان داۋ ارىلماعان تۋريستىك كومپانياعا ەكىنشى دەڭگەيلى بانكتەر دە نەسيە بەرۋدەن تارتىنشاقتاپ وتىر. ال ۇلكەن مولشەردەگى الاياقتىققا دەپ قوزعالعان قىلمىستىق ءىس بويىنشا تۋرفيرما باسشىلارىنان جۋىردا جاۋاپ الىنباق جانە ولار ايىپتى دەپ تانىلسا 10 جىلعا دەيىن اباقتىعا جابىلۋى مۇمكىن.
kaz.gazeta.kz
