بيۋجەتتىڭ كىرىس جوسپارى 309 ميلليارد تەڭگەگە اسىرا ورىندالدى - جاماۋبايەۆتىڭ پرەزيدەنتكە ەسەبىنەن

قازاقپارات بۇل تۋرالى اقورداعا سىلتەمە جاساپ حابارلايدى.

ە. جاماۋبايەۆتىڭ پرەزيدەنتكە جاساعان بايانداماسىنان:

- ىشكى ءونىمنىڭ ءوسىمى 3,1 پايىزعا جەتىپ، ينۆەستيتسيا كولەمى 7,8 پايىزعا ارتتى. ەكونوميكانىڭ بارلىق سالاسى دامىپ كەلەدى.

- وڭدەۋ ونەركاسىبىندەگى ءوندىرىس دەڭگەيى 3,4 پايىزعا، قۇرىلىس كولەمى 9,4 پايىزعا، اۋىل شارۋاشىلىعى ءونىمىنىڭ كورسەتكىشى 9,1 پايىزعا ءوستى.

- سىرتقى ساۋدا اينالىمى 33,4 پايىزعا ءوستى. ساۋدا بالانسى ايتارلىقتاي نىعايىپ كەلەدى. بۇل رەتتە وڭدەلگەن تاۋارلار ەكسپورتى 33,8 پايىزعا ءوسىپ، 24,1 ميلليارد دوللارعا جەتتى.

- رەسپۋبليكالىق بيۋجەتتىڭ كىرىسى جونىندەگى جوسپارى 309 ميلليارد تەڭگەگە اسىرا ورىندالدى.

سونداي-اق ق. توقايەۆقا بيۋجەت جانە سالىق جاڭا كودەكستەرىنىڭ ازىرلەنۋ بارىسى، «ۇلتتىق قور - بالالارعا» جوباسىنىڭ جۇمىس مەحانيزمدەرى، زاڭسىز يەلەنگەن جانە ەلدەن شىعارىلعان اكتيۆتەردى مەملەكەتكە قايتارۋ ءۇشىن قابىلدانىپ جاتقان شارالار تۋرالى اقپارات بەرىلدى، جەكە تۇلعالاردىڭ بانكروتتىعى تۋرالى زاڭنىڭ جۇزەگە اسىرىلۋى تۋرالى ايتىلدى.

مەملەكەت باسشىسىنىڭ تاپسىرماسىنا سايكەس، سىبايلاس جەمقورلىققا قاتىستى قىلمىستىق ىستەر بويىنشا تاركىلەنگەن قاراجات «ءبىلىم بەرۋ ينفراقۇرىلىمىن قولداۋ قورىنا» جىبەرىلىپ جاتىر. قازىرگى كەزدە ارنايى شوتتا جينالعان 120 ميلليارد تەڭگەگە جۋىق قاراجات مەكتەپتەردىڭ قۇرىلىسى مەن جوندەۋ جۇمىستارىنا جۇمسالادى.

كەزدەسۋ سوڭىندا قاسىم-جومارت توقايەۆ بيۋجەت قاراجاتىن ءتيىمدى پايدالانۋعا، مەملەكەت قارجىسىنىڭ جاعدايىن جاقسارتۋعا، سونداي-اق سالىقتىق جانە كەدەندىك اكىمشىلەندىرۋ ءىسىن جەتىلدىرۋگە باعىتتالعان ءبىرقاتار تاپسىرما بەردى.