الەم بايلارى جاڭا جىل باستالعالى 305 ميلليارد دوللارىنان ايىرىلدى

بۇل تۋرالى interfax.ru اگەنتتىگىنە سىلتەمە جاساعان egemen.kz ءتىلشىسى حابارلادى.

جاڭا جىلدىڭ العاشقى ەكى اپتاسىندا الەمنىڭ ەڭ قالتالى 400 ادامى جالپى ايتقاندا 305 ميلليارد دوللارىنان ايىرىلدى. سول سەبەپتى، الەمدىك نارىق ءۇشىن 2016-جىلدىڭ باسى ەڭ كۇردەلى كەزەڭ رەتىندە ەستە قالدى.

Bloomberg كومپانياسىنىڭ مالىمدەۋىنشە، جاعىمسىز ديناميكا ازيا، ەۋروپا جانە امەريكا نارىقتارىندا ءجيى بايقالۋدا. سونداي-اق، يرانعا قارسى سانكسيانى الىپ تاستاۋ ماسەلەسى قوزعالعالى مۇنايدىڭ دا باعاسى كۇرت تومەندەپ كەتتى.

Bloomberg Billionaires Index- ءتىڭ دەرەكتەرىنە سۇيەنسەك، وسى اپتانىڭ وزىندە عانا الەم بايلارى 115 ميلليارد دوللارىن جوعالتتى. سونىڭ ىشىندە 76 ميللياردەردىڭ ءارقايسىسى ءبىر ميلليارد جانە ودان دا كوپ اقشاسىنان ايىرىلدى. سونداي-اق، تەك جۇما، ياعني، ءبىر كۇننىڭ وزىندە جەتى ادامنىڭ ءارقايسىسىنىڭ بايلىعى ءبىر ميلليارد دوللارعا جانە ودان دا كوپ قارجىعا ازايدى.

2016-جىل باستالعالى داعدارىستان ەڭ كوپ زارداپ شەككەن ميللياردەر - Amazon كومپانياسىنىڭ نەگىزىن قالاۋشى، الەمنىڭ ەڭ باي ادامدارىنىڭ قاتارىندا 4-ورىندا تۇرعان دجەفف بەزوس. ول 1- قاڭتاردان بەرى 8,9 ميلليارد دوللارىن جوعالتتى. وسى اپتانىڭ اياعىندا ونىڭ كومپانياسىنىڭ اكسياسى 3,85 پايىزعا ارزانداپ، 1,9 ميلليارد دوللارى جەلگە ۇشتى.

ال الەم بايلارىنىڭ ىشىندە كوش باستاپ تۇرعان بيلل گەيتس جاڭا جىلدان بەرى 6,8 ميلليارد دوللارىنان ايىرىلدى. قىتايدىڭ ەڭ باي ادامى ۆان جيانليڭ دە مەشىن جىلى باستالعالى 6,4 ميلليارد دوللارىن جوعالتتى.

ەڭ باي ادامداردىڭ تىزىمىندە تۇرعان 400 ميللياردەردىڭ 9 ى عانا جاڭا جىلدى تابىستى باستادى. ولاردىڭ ىشىندە Reliance Industries Ltd. كومپانياسىنىڭ باسشىسى، ءۇندىستان كاسىپكەرى مۋكەش امبانيدىڭ ەسەبى تۇگەل. اتاپ ايتقاندا، ول 1- قاڭتاردان بەرى بايلىعىن 620 ميلليون دوللارعا كوبەيتتى.

قازىرگى تاڭدا تىزىمدە تۇرعان ەڭ باي ادامداردىڭ بايلىعى 3,6 تريلليون دوللاردى قۇرايدى. 2015-جىلدىڭ مامىر ايىندا بۇل كورسەتكىش 4,3 تريلليون دوللار بولعان ەدى.