سامۇرىق-قازىنا جالعىز اكسيونەرى - ۇكىمەتكە 302 ميلليارد تەڭگە ديۆيدەند تولەدى
بۇل تۋرالى اتالعان قوردىڭ ەكونوميكا جانە قارجى جونىندەگى ديرەكتورى نازيرا نۇربايەۆا ءمالىم ەتتى، دەپ حابارلايدى قازاقپارات ءتىلشىسى.
«قوردىڭ ديۆيدەند ساياساتىنا سايكەس، ۇكىمەتتىڭ تاپسىرماسى بويىنشا قوردىڭ الەۋمەتتىك جوبالاردى قارجىلاندىرۋ كولەمىن ەسەپكە العانداعى جىل سايىنعى ديۆيدەند مولشەرى قوردىڭ جۇيە قۇراۋشى كومپانيالاردان الاتىن ديۆيدەندتەرىنىڭ 50 پايىزىنا تەڭ. 2022-جىلى ديۆيدەند ساياساتىنىڭ ورىندالۋى - 124 پايىز، ياعني تيەسىلى 245 ميلليارد تەڭگەنىڭ ورىنا اكسيونەرگە تولەنگەن جالپى سوما 302 ميلليارد تەڭگە بولىپ وتىر»، - دەدى ول قوردا وتكەن باسپا ءسوز ءماسليحاتىندا.
ونىڭ اتاپ وتۋىنشە، 2021-جىلى ديۆيدەند ساياساتىنىڭ جاڭا ادىستەرى قابىلدانعان ساتتەن بەرى جالعىز اكسيونەردىڭ پايداسىنا اۋدارىلعان تولەم مولشەرى 2 ەسەگە ارتتى.
«جالعىز اكسيونەرگە تولەنگەن 302 ميلليارد تەڭگەدەن بولەك، قور توبى ءىرى سالىق تولەۋشى سانالادى. 2022-جىلدىڭ ناتيجەسىندە تولەنگەن سالىق سوماسى - 1,7 تريلليون تەڭگە. بۇل - 2021-جىلعى كورسەتكىشتەن 529 ميلليارد تەڭگەگە ارتىق»، - دەدى نازيرا نۇربايەۆا.
