بيىل تاريحي وتانىنا كوشىپ كەلگەن 3012 قانداسىمىزدىڭ قانشا پايىزى قىتايدان كەلدى؟

استانا. قازاقپارات - 1- قازانداعى مالىمەتتەر بويىنشا بيىلعى جىلدىڭ باسىنان باستاپ تاريحي وتانىنا 3012 ەتنيكالىق قازاق ورالىپ (1164 وتباسى)، ورالمان مارتەبەسىن الدى، - دەپ حابارلايدى ق ر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ باسپا ءسوز قىزمەتى.

وتانىنا ورالعان قانداستارىمىزدىڭ باسىم كوپشىلىگى جامبىل وبلىسىندا -  213 وتباسى (529 ادام)، وڭتۇستىك قازاقستان وبلىسى -  208 وتباسى (527 ادام)، قوستاناي وبلىسى -  189 وتباسى (452 ادام)، ماڭعىستاۋ وبلىسى -  108 وتباسى (487 ادام)، سونداي-اق، وزگە دە ايماقتارعا قونىستانعان.

ولاردىڭ كوپشىلىگى وزبەكستاننان - 78,6 پايىز، 6,7 پايىز - تۇركمەنستاننان، 6 پايىز - قىتايدان، 3,1 پايىز - موڭعوليادان، 5,6 پايىز - باسقا ايماقتاردان كەلگەن.

ەڭبەككە جارامدى جاستاعى تۇلعالاردىڭ كورسەتكىشى - 61,1  پايىز، 18 جاسقا دەيىنگى بالالار - 32,5  پايىز، زەينەتكەرلەر - 6,3  پايىزدى قۇراپ وتىر.

ەڭبەككە جارامدى جاستاعى ورالمانداردىڭ  49,6 پايىزى جالپى ورتا ءبىلىمدى، 32,8  پايىز - ورتا ارناۋلى، 15,4 پايىز - جوعارعى ءبىلىمدى، 2,1 پايىزنىڭ ءبىلىمى جوق.

ەستەرىڭىزگە سالا كەتەيىك، 1991 مەن 2014-جىلدار ارالىعىندا قازاقستانعا 259 مىڭ 159 وتباسى بولماسا 952 مىڭ 882 ەتنيكالىق قازاقتار قايتا كەلىپ، ورالمان مارتەبەسىن العان بولاتىن. بۇل جالپى حالىق سانىنىڭ 5,5 پايىزىن قۇرادى.

قازىرگى تاڭدا ق ر پارلامەنتى ەلباسىنىڭ 2014-جىلعى 4- مامىرداعى تاپسىرماسىن جۇزەگە اسىرۋ ماقساتىندا ازىرلەنگەن «كەيبىر زاڭنامالىق اكتىلەرگە حالىقتىڭ كوشى-قونى جانە جۇمىسپەن قامتىلۋى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ق ر زاڭىنىڭ جوباسىن قاراستىرۋدا.

ەتنيكالىق قازاقتاردى ءوز تاريحي وتانىنا ورالۋعا ىنتالاندىرۋ ماقساتىندا زاڭ جوباسى كەلەسى ماسەلەلەردى قاراستىرادى:

- ەتنيكالىق قازاقتارعا قونىستانۋ وڭىرىنە قاراماستان ورالمان مارتەبەسىن بەرۋ. ولارعا شەتەلدىك ازاماتتارعا قاراعاندا كوشى-قون پوليتسياسىنا حابارلاسۋ ارقىلى تولەم قابىلەتىن راستاۋسىز ۋاقىتشا تۇرۋ ىقتيارحاتىن الۋ مۇمكىندىگى بەرىلەدى؛

- ەتنيكالىق قازاقتارعا ۇكىمەت بەلگىلەگەن وڭىرلەرگە قونىستانعان جاعدايدا الەۋمەتتىك پاكەت بەرۋ. سونداي-اق، ەلىمىزدىڭ كەز كەلگەن وڭىرىنەن ۇكىمەت ايقىنداعان ەكىنشى وڭىرگە قونىستانعان ورالماننىڭ الەۋمەتتىك قولداۋدى الۋعا مۇمكىندىگى بولادى. ەگەر ولار قونىستانعان وڭىردەن 5  جىل مەرزىمنەن بۇرىن قونىس اۋدارىپ كەتەتىن بولسا، العان كومەكتەرىن ۇكىمەتكە قايتارۋ مىندەتتەرى قاراستىرىلعان.

- ورالماندارعا قازاقستان رەسپۋبليكاسىنىڭ ازاماتتىعىن بەرۋ مەرزىمىن ۋاقىتشا تۇرۋ ىقتيارحاتىن العاننان كەيىن 1 جىلعا دەيىن قىسقارتۋ كوزدەلەدى.

baq.kz