شىعىس قازاقستاندا بيىل ينتەرنەت الاياقتىقتىڭ 300 گە جۋىق فاكتىسى تىركەلدى
ءوڭىر بويىنشا بيىل ينتەرنەت ارقىلى جاسالعان الاياقتىقتىڭ 300 گە جۋىق فاكتىسى تىركەلدى. ونىڭ %80 ى وبلىس جانە رەسپۋبليكا اۋماعىنان تىس جەردەن جاسالعان. بۇل تۋرالى باسپا ءسوز ءماسليحاتى بارىسىندا وسكەمەن قالاسى پوليتسيا باسقارماسى كريمينالدىق پوليتسيا بولىمشەسى باستىعىنىڭ ورىنباسارى ازامات راحادىلوۆ ءمالىم ەتتى.
«قازىرگى ۋاقىتتا ينتەرنەت الاياقتىق - قىلمىستىڭ ەڭ كوپ تاراعان تۇرىنە جاتادى. الاياقتار حالىقتى ولح، كولەسا، كرىشا سايتتارىندا جانە الەۋمەتتىك جەلىلەردە كەزدەسەتىن تاۋارعا نەمەسە قىزمەتكە الدىن الا تولەم جاساۋدى سۇراۋ ارقىلى الدايدى. سونىمەن قاتار بانك قىزمەتكەرلەرى اتىنان قوڭىراۋ شالىپ، جابىرلەنۋشىنىڭ شوتتارىنا كۇماندى وپەراتسيالار جۇرگىزىلىپ جاتقاندىعى تۋرالى سەندىرىپ، ونىڭ اتىنا نەسيە راسىمدەيدى نەمەسە شوتتا بار اقشانى تولىعىمەن شەشىپ الادى. ازاماتتارعا قوڭىراۋ شالىپ وزدەرىن قۇقىق قورعاۋ ورگاندارىنىڭ قىزمەتكەرلەرى دەپ تانىستىرا وتىرىپ، تانىسى نەمەسە جاقىن تۋىسى قيىن جاعدايعا تاپ بولعانىن جانە وعان كومەكتەسۋ ءۇشىن بەلگىلى ءبىر مولشەردە اقشا قاجەت ەكەنىن ايتۋ ارقىلى دا الاياقتىق جاسالعان فاكتىلەر جەتەرلىك»، - دەيدى ول.
الاياقتىڭ قۇربانى بولماۋ ءۇشىن بىرنەشە قاراپايىم قاعيدانى ەستە ساقتاۋ قاجەت.
«بانك قىزمەتكەرلەرى ەشقاشان ءوز كليەنتتەرىنە قوڭىراۋ شالىپ، تەلەفونىڭىزعا جىبەرىلگەن كىلتسوزدى سۇرامايدى. ەشكىمگە جانە ەشبىر جاعدايدا ءوزىڭىزدىڭ جەكە دەرەكتەرىڭىزدى ايتۋعا بولمايدى. ج س ن، كارتوچكا نومىرلەرىن، پين- كودتار مەن س م س- تەر، كارتا ىشكى جاعىنداعى 3 تاڭبالى ءنومىردى ەشقاشان ايتپاڭىز. 2 اپتادا ءبىر رەت ءموبيلدى بانكينگتەگى كودتى وزگەرتىپ وتىرىڭىز»، - دەدى باسقارما باستىعىنىڭ ورىنباسارى ورال رىسبايەۆ.
