اقتوبەلىك ۇلتى ورىس اقساقال 300 ماقالدى جاتقا ايتىپ، باتا بەرەدى - ۆيدەو
اقساقال قازاقشا باتا بەرىپ، مالاق- ماتەل ايتقاندا قاتارلاستارىن سۇرىندىرەدى.
توي-تومالاقتا باتا بەرىپ، ماقالداپ سويلەيتىن نيكولاي يۆانوۆيچتى كەڭقياق اۋىلىنىڭ تۇرىندارى جاقسى بىلەدى. ءسوزى ءتۇزۋ، ىسىنە مىعىم اقساقال اۋىلداستارىنىڭ اراسىندا قۇرمەتكە يە.
«بيىل 77 جاسقا تولامىن. قازاق ءتىلى انا ءتىلىم سياقتى. وسى ۋاقىتقا دەيىن تەك قازاقشا سويلەپ كەلدىم. دوستارىم، جولداستارىمنىڭ باسىم بولىگى قازاقتار. مەن ماقالداپ سويلەگەندە كەيبىرەۋلەر تاڭ قالادى. قازىر 300 دەي ماقال-ماتەل بىلەمىن. جيىن-تويدا جاستارعا باتا بەرەمىن»، - دەيدى اقساقال.
نيكولاي شالقار اۋدانى كوپمولا ستانساسىندا تۋىپ وسكەن. اكە-شەشەسى وتىزىنشى جىلدارى رەسەيدىڭ ورىنبور وڭىرىنەن قونىس اۋدارىپتى. تەمىرجول سالاسىندا جۇمىس ىستەۋگە كەلگەن ەكى جاس كوپمولا ستانساسىندا تۇراقتاپ قالادى. ءۇش ۇل، بەس قىزدى تاربيەلەپ وسىرەدى.
«ول ۋاقىت سوعىستان كەيىنگى قيىن كەزەڭ عوي. ءارى-بەرى كوشۋدىڭ ءوزى وڭاي ەمەس. سەگىز بالانى ومىرگە اكەلگەن اتا-انام جىلى ورىنىن سۋىتقىسى كەلمەي، تۇراقتاپ قالعان. بالالىق شاعىم سول شاعىن ستانسادا ءوتتى. اكە-شەشەم قازاقشا بىلمەيدى. ال ۇيدەگى التى باۋىرىم باس قوسا قالساق قازاقشا سويلەيمىز. كەيىن 1974 -جىلى ەكى اپامنىڭ شاقىرۋىمەن كەڭقياققا كوشىپ كەلدىك. اسكەردەن كەلگەنەن كەيىن تەمىرجول سالاسىندا ەڭبەك ەتتىم. ال كەڭقياققا كەلگەن سوڭ مۇناي-گاز سالاسىندا جۇمىس ىستەدىم»، - دەيدى نيكولاي اقساقال.
نيكولاي يۆانوۆيچ 300 ماقالدى جاتقا ايتادى.
«قازاقشا بىلەتىن بولعاسىن ءتۇرلى جارىستارعا قاتىستىرادى. ونداي سايىستا كوزىمنىڭ كوكتىگى ءۇشىن ورىن بەرمەيدى عوي، ونەرىم بولۋى كەرەك. سودان ماقال-ماتەلدەردى جاتتاۋعا كىرىستىم. الدىمەن بارلىق ماقالدى قاعازعا جازىپ الدىم. جۇمىسقا بارا جاتقاندا قاعازىما قاراپ، جاتتاپ ايتىپ بارامىن. سودان ءبىر جىلدىڭ شاماسىندا 300 دەي ماقال جاتتادىم. وكىنىشكە قاراي سول جاتتاعان ماقالىم جارىستاردا ىسكە اسپادى. ءبىراق قازىر جازعان دۇنيەمدى تاستاۋعا قيماي، ۇمىتپاس ءۇشىن اپتا سايىن قايتالاپ ايتىپ جۇرەمىن»، - دەيدى اقساقال.
نيكولاي يۆانوۆيچ باتانىڭ دا ءتۇر-ءتۇرىن بىلەدى. جولعا شىققاندا ايتاتىن ساقتىق باتا، توي باتا، ناۋرىز باتانى بەرگەندە كوپشىلىكتى تاڭداي قاقتىرادى. بىردە 300 ادام جينالعان تويدا نيكولاي اقساقال كوپشىلىككە توي باتاسىن بەرىپتى. ريزا بولعان توي يەسى اقساقالعا شاپان جاۋىپتى.
«باتانىڭ دا ءوز ءتارتىبى بار. تويدا بەرەتىن، جولعا شىققاندا ايتاتىن باتا بولادى. مەنىڭ بىلگەنىمدى كەي قازاقتار بىلمەيدى»، - نيكولاي اقساقال كۇلىپ.
اقساقال قازىر بىلگەنىن نەمەرەسى ۆيكتورياعا ۇيرەتەدى. ول دا قازاق تىلىندە مۇدىرمەي سويلەيدى. ءتۇرلى جارىستارعا قاتىسىپ جۇلدەلى ورىندار الىپ ءجۇر.
«مەكتەپكە بارا جاتقاندا بوس بارما، ماقال-ماتەل جاتتاپ بار» دەپ ايتامىن. جانە ىنتالاندىرىپ ءار جاتتاعان ماقال ءۇشىن ديۆيدەند بەرەمىن. ول دا ەڭبەكقوي»، - دەيدى نيكولاي يۆانوۆيچ.
اقساقال ۆاليا اجەي ەكەۋى ءبىر ۇل، ەكى قىز تاربيەلەپ، ءوسىرىپتى. قازىر بالالارى قالادا تۇرادى. وسىدان بەس جىل بۇرىن ۆاليا اجەي كوز جۇمعان. اقساقال سودان بەرى جالعىز ءوزى تىرشىلىك كەشىپ جاتىر. جاسى سەكسەنگە جاقىنداسا دا ءسوزى ءتۇزۋ، شيراق قيمىلدايتىن نيكولاي يۆانوۆيچ قوراسىندا ازىن-اۋلاق مال ۇستايدى. باۋ-باقشا ەگەدى. تىنىم تاپپايدى. اندا-ساندا بالالارى كەلىپ تۇرادى ەكەن.
Massaget.kz