سەرىك كۇدەبايەۆتىڭ زاڭسىز بۇيرىعىنان جوعالعان 300 گە جۋىق قارۋ تابىلمادى - پروكۋرور
«كۇدەبايەۆ 5-6- قاڭتار كۇنى تالدىقورعانداعى جاعدايلارعا، تىكەلەي مىندەتتەرىنە قاراماستان، ءوزىنىڭ قارماعىنداعىلارعا پوليتسيا دەپارتامەنتىنىڭ عيماراتىنان كەتۋگە بۇيرىق بەرگەن. ءوزى دە تالدىقورعان قالاسىنان سىرتقا كەتىپ قالدى. سالدارىنان كوپتەگەن عيمارات قيرادى، ورتەندى. قوعامدىق ءتارتىپ بۇزىلدى»، - دەدى جەتىسۋ وبلىسىنىڭ پروكۋرورى سايان دۇيسەبايەۆ.
پروكۋرور وسىنىڭ سالدارىنان ستراتەگيالىق نىساننان 500 گە جۋىق قارۋ-جاراق ۇرلانىپ، ونىڭ 300 گە جۋىعى ءالى تابىلماعانىن ءمالىم ەتتى.
ايتا كەتەيىك، بۇگىن سەرىك كۇدەبايەۆ بيلىك پەن لاۋازىمدىق وكىلەتتىلىگىن پايدالانۋ، ازاپتاۋ باپتارى بويىنشا كىنالى دەپ تابىلىپ، 10 جىلعا باس بوستاندىعىنان ايىرىلدى. ول جازاسىن قاۋىپسىزدىگى ورتاشا تۇزەۋ مەكەمەسىندە وتەيدى. سونداي-اق، كۇدەبايەۆ 10 جىل بويى مەملەكەتتىك قىزمەتتە جۇمىس ىستەۋ قۇقىعىنان ايىرىلدى. سۋديا ونى بارلىق مەملەكەتتىك ناگرادالارىنان ايىرۋ جونىندە ۇسىنىس ەنگىزدى. بۇعان دەيىن ايىپتالۋشى سەرىك كۇدەبايەۆ كىنالى ەمەستىگىن ايتتى.
ەسكە سالا كەتەيىك، تالدىقورعانداعى جەتىسۋ وبلىستىق سوتىندا سەرىك كۇدەبايەۆقا قاتىستى سوت وتىرىسى 5- قاڭتاردا باستالعان.
سوتتالۋشىنىڭ پروتسەسكە كەلمەگەنىنە بايلانىستى سەرىك كۇدەبايەۆتى سوتقا ءماجبۇرلى تۇردە جەتكىزۋ جونىندە قاۋلى شىقتى.
ال، 3- ساۋىردە سەرىك كۇدەبايەۆقا حالىقارالىق ىزدەۋ جاريالانعان بولاتىن.
الايدا، كۇدىكتىنىڭ ەل اۋماعىنان تىسقارى بوي تاسالاعانىن شەكارا قىزمەتى ناۋرىزدىڭ 27 ءى كۇنى ءبىر-اق بىلگەن.
باس پروكۋراتۋرا سەرىك كۇدەبايەۆتىڭ قاشىپ كەتۋ فاكتىسىنە وراي قىلمىستىق ءىس قوزعادى.
27- ءساۋىر كۇنى كۇدەبايەۆتىڭ ۇستالعانى تۋرالى اقپاراتتى باس پروكۋراتۋرا راستادى.
سەرىك كۇدەبايەۆتىڭ ۇلى ارمان مىرزاقۇلوۆ اكەسىنىڭ ەلگە ءوز ەركىمەن كەلگەنىن مالىمدەدى.
ايتا كەتەيىك، سەرىك كۇدەبايەۆ 2020-جىلدان باستاپ 2022-جىلدىڭ قاڭتارىنا دەيىن الماتى وبلىسى پوليتسيا دەپارتامەنتىنىڭ باستىعى قىزمەتىن اتقاردى. سول لاۋازىمىن اتقارۋ كەزىندە قاڭتار وقيعاسى بويىنشا كۇدىكتى دەپ تانىلعان.