قايرات ساتىبالدى شەتەلدىك باعالى قاعازدارعا 300 ميلليون ا ق ش دوللارىن سالعان - انتيكور
استانا. قازاقپارات - شەت ەلدەردەن قۇنى 230 ميلليون ا ق ش دوللارىنان اساتىن ەكسكليۋزيۆتى اسىل تاستار مەن زەرگەرلىك بۇيىمدار ەلگە قايتارىلدى، دەپ حابارلايدى قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتتىگى.
«قايرات ساتىبالدى ۇلى مەن باسقا دا ادامدارعا قاتىستى قىلمىستىق جولمەن الىنعان اقشانى جانە وزگە دە مۇلىكتى زاڭداستىرۋ (جىلىستاتۋ) فاكتىلەرى بويىنشا سوتقا دەيىنگى تەرگەپ-تەكسەرۋ جالعاسۋدا.
جەدەل-ىزدەستىرۋ ءىس-شارالارىنىڭ ناتيجەسىندە الىس شەت ەلدەردە فيگۋرانتتارعا تيەسىلى، قۇنى 230 ميلليون ا ق ش دوللارىنان اساتىن، مەملەكەت كىرىسىنە اينالدىرىلعان ەكسكليۋزيۆتى اسىل تاستار مەن زەرگەرلىك بۇيىمدار ەلگە قايتارىلدى» دەلىنگەن حابارلامادا.
سونىمەن قاتار، ق. ساتىبالدى ۇلىنىڭ شەتەلدىك باعالى قاعازدارعا 300 ميلليون ا ق ش دوللارىن سالۋ فاكتىسى انىقتالدى. كورسەتىلگەن سوما جاقىن ارادا قازاقستان بيۋدجەتىنە تۇسەدى.
مەملەكەت باسشىسىنىڭ تاپسىرماسى بويىنشا زاڭسىز اكەتىلگەن كاپيتالدى ىزدەۋ جانە ەلگە قايتارۋ جالعاسۋدا.
