شەتەلدىكتەردى قابىلدايتىن قازاقستاندىقتار زاڭنامانى بۇزسا، 300 مىڭ تەڭگەگە دەيىن ايىپپۇل تولەيدى

زاڭ بۇزعاندارعا ايىپپۇل قاراستىرىلعان.

بۇل تۋرالى استانا قالاسىنىڭ پوليتسيا دەپارتامەنتى كوشى-قون قىزمەتى باسقارماسىنىڭ باستىعى ارمان بايمۇحانبەت ايتتى، دەپ حابارلايدى قازاقپارات ءتىلشىسى.

«كوشىپ كەلۋشىلەردىڭ قازاقستان رەسپۋبليكاسىنا كەلۋى مەن وندا بولۋ قاعيدالارىنىڭ 9-تارماعىنا سايكەس، شەتەلدىكتەردى قابىلدايتىن جەكە جانە زاڭدى تۇلعالار كەلۋشىلەرى تۋرالى ىشكى ىستەر ورگاندارىن حاباردار ەتۋگە مىندەتتى ەكەنىن ەسكەرتەمىز. اتالعان حابارلاما شەتەلدىك ازامات كەلگەن كۇننەن باستاپ، ءۇش جۇمىس كۇنى ىشىندە مىندەتتى تۇردە بەرىلەدى. وسى مەرزىمدى وتكىزىپ العان جانە كوشىپ كەلۋشىنىڭ كەلۋى تۋرالى ىشكى ىستەر ورگاندارىنا حابارلاماعان جاعدايدا قازاقستاندا قابىلداۋشى جەكە جانە زاڭدى تۇلعا ق ر اكىمشىلىك قۇقىقبۇزۋشىلىقتار تۋرالى كودەكسىنىڭ 518-بابى بويىنشا جاۋاپقا تارتىلادى»، - دەدى ا. بايمۇحانبەت ەلوردا اكىمدىگىندە وتكەن بريفينگىدە.

ونىڭ ايتۋىنشا، زاڭدى تۇلعالار ءۇشىن 10 نان 25 ا ە ك- كە دەيىن، قايتالانعان جاعدايدا - 100 ا ە ك- كە دەيىن ايىپپۇل قاراستىرىلعان. بۇل 306 مىڭ تەڭگەگە تەڭ. جەكە تۇلعالار ءۇشىن ەسكەرتۋ تۇرىندەگى جازا، ال زاڭدى قايتا بۇزعانى ءۇشىن - 30 ا ە ك نەمەسە 91890 تەڭگە مولشەرىندە ايىپپۇل كوزدەلگەن.

«شەتەلدىكتىڭ كەلۋى تۋرالى حابارلامانى قابىلداۋشى تاراپ ءۇش تاسىلمەن بەرە الاتىنىن ەسكە سالامىز. ءبىرىنشى، جەكە جانە زاڭدى تۇلعالار كوشىپ كەلۋشىنىڭ كەلگەنى تۋرالى ۆيزالىق جانە كوشى-قون پورتالى - vmp.gov.kz نەمەسە egov.kz ارقىلى حابارلاي الادى. ەكىنشى، قازاقستان تاراپىنان قابىلداۋشى جەكە جانە زاڭدى تۇلعالار شەتەلدىكتىڭ كەلگەنى تۋرالى حابارلامانى تىكەلەي ءوز اۋدانى بويىنشا ىشكى ىستەر ورگاندارىنىڭ كوشى-قون قىزمەتىنىڭ بولىمدەرى مەن بولىمشەلەرىنە بەرە الادى. ءۇشىنشى ءتاسىل - e-qonaq قوسىمشاسى ارقىلى.

جەكە جانە زاڭدى تۇلعالار زاڭنىڭ وسى تالاپتارىن ساقتاۋعا مىندەتتى ەكەنىنە تاعى دا نازار اۋدارامىز. شەتەلدىك قوناقتار وزدەرىنىڭ پاسپورت دەرەكتەرىن قابىلداۋشى تاراپقا حابارلاۋى جانە ق ر زاڭناماسىن ساقتاۋى ءتيىس»، - دەدى ارمان بايمۇحانبەت.

بۇعان دەيىن سپيكەر جىل باسىنان بەرى استاناعا قانشا شەتەلدىك ازامات كەلگەنىن جاريالاعان ەدى.