تابيعات اۋماعىندا وت جاققاندار 300 مىڭ تەڭگەگە دەيىن ايىپپۇل تولەيدى
الماتى. قازاقپارات- الماتىنىڭ تاۋلى- ورماندى جەرلەرىندە ءورت قاۋىپسىزدىگى ەرەجەلەرىن بۇزعانى ءۇشىن 21 ادام جاۋاپقا تارتىلدى، دەپ حابارلايدى قازاقپارات ءتىلشىسى.
«ارنايى رەيد بارىسىندا تابيعات اياسىندا دەمالۋشىلارعا 10 مىڭعا جۋىق جادىناما تاراتىلدى. سونىمەن قاتار تەكسەرۋ كەزىندە ماماندار تاۋلى جەردە وت جاعۋدىڭ 39 جاعدايدىڭ الدىن الدى. 21 ادام اكىمشىلىك جاۋاپقا تارتىلدى، ونىڭ ەكەۋىنە 76575 تەڭگەگە ايىپپۇل سالىندى»، - دەپ حابارلادى قالالىق توتەنشە جاعدايلار دەپارتامەنتىنىڭ باسپا ءسوز قىزمەتى.
ايتا كەتسەك، ورمان شارۋاشىلىعى مەكەمەلەرى مەن تابيعاتتى قورعاۋ پوليتسياسىنىڭ قىزمەتكەرلەرى ەرەكشە قورعالاتىن تابيعي اۋماقتاردا وت جاققانى ءۇشىن اكىمشىلىك ايىپپۇل سالۋعا ۋاكىلەتتى. ايىپپۇل سوماسى 30 مىڭنان 306300 تەڭگەگە دەيىن.
«وسىعان وراي، دەمالۋشىلاردان تەمەكى تۇقىلىن قۇرعاق شوپكە تاستاماۋدى، وت جاقپاۋدى جانە اشىق وتتى پايدالانباۋدى، شىنى سىنىقتارىن جانە باسقا دا قوقىستاردى قالدىرماۋدى سۇرايمىز. ىلە- الاتاۋ ۇلتتىق پاركىندە، الما - اراساندا، ۇلكەن الماتى جانە كازاچكا وزەندەرىنىڭ بويىندا تاماق دايىنداۋ ءۇشىن ارنايى جابدىقتالعان ورىندار (ورىندىق، ۇستەل، بەتوندالعان الاڭ، مانگال) بار. سوندىقتان شىرشا جانىندا وت جاعۋعا قاتاڭ تىيىم سالىنادى»، - دەپ اتاپ ءوتتى دەپارتامەنت ماماندارى.
سونىمەن قاتار، مەدەۋ اۋدانىنداعى مەدەۋ تابيعي پاركىندە جانە ناۋرىزباي اۋدانىنداعى اقساي شاتقالىندا وت جاعۋعا بولمايدى. بۇعان دەيىن الماتى تاۋلارىندا ءورتتىڭ الدىن الۋ ءۇشىن درون پايدالانىلاتىنى تۋرالى جازعان بولاتىنبىز.
اۆتور: الما مۇقانوۆا
