سارىشاعان پوليگونىندا س-300 زەنيتتىك- زىمىراندىق كەشەنى سىناقتان ءوتتى
نۇر- سۇلتان. قازاقپارات - قازاقستاندىق كاسىپورىندا كۇردەلى جوندەۋدەن وتكەن С-300 PS زەنيتتىك- زىمىراندىق كەشەنى سارىشاعان پوليگونىندا سىناقتان وتكىزىلدى.
وسىلايشا، بۇل جۇيەنى قالپىنا كەلتىرۋ جانە جاۋىنگەرلىك كەزەكشىلىككە ەنگىزۋگە بايلانىستى ۇزاق مەرزىمدى باعدارلاما اياقتالدى. قازاقستاندىق زەنيتتىك- زىمىراندىق كۇشتەرگە قىزمەت كورسەتەتىن «گرانيت» ارنايى كونسترۋكتورلىق- تەحنولوگيالىق بيۋروسى الداعى ۋاقىتتا «Бук-М2 « جانە « Toр-M2 « تاكتيكالىق اۋە شابۋىلىنا قارسى قورعانىس جۇيەلەرىنە تەحنيكالىق قولداۋ كورسەتەدى.
قازاقستان ولاردى جاقىندا عانا ساتىپ الدى. سارىشاعان پوليگونىنداعى С-300 PS - ءتى باقىلاۋ سىناقتارى ەكى اپتاعا سوزىلدى. جالپى العاندا بۇل 12 نەگىزگى جانە قوسالقى تەحنيكا قازاقستان بويىنشا 1200 شاقىرىمنان استام جول ءجۇرىپ، وقۋ پوليگونىندا كەشەن ءوز ورنىن بىرنەشە رەت وزگەرتتى. سوڭعى كەزەڭىندە قارۋدىڭ دالدىگى تەكسەرىلدى.
«گرانيت» قورعانىس كاسىپورنىنىڭ اسكەريلەرى مەن ماماندارى كەشەننىڭ بارلىق جۇيەلەرىن سىناقتان وتكىزدى. تەحنيكانىڭ قوزعالتقىشتارى مەن كابەل قوسىلىمدارى، باعدارلامالىق قامتاماسىز ەتىلۋىنە دەيىن تەكسەرىلدى.
نۇرلان ورمانبەتوۆ، ق ر ا ق ك باس قولباسشىسى، گەنەرال- لەيتەنانت:
- بۇل كەشەندى كۇردەلى جوندەۋ جانە جاڭعىرتۋ بويىنشا بىرنەشە جىلعا سوزىلعان باعدارلاما بۇگىن اياقتالدى. ءبارى ويداعىداي بولدى دەپ ايتۋعا تولىق نەگىز بار. سىناق سوڭى جوعارى جىلدامدىقتاعى زىمىران ۇشىرۋمەن اياقتالدى.
ەسكە سالايىق، بىرنەشە جىل بۇرىن ەكىجاقتى كەلىسىمدەرگە سايكەس رەسەيلىكتەر قازاقستانعا С-300 PS ديۆيزيوندىق جيىنتىعىن سىيعا تارتقان بولاتىن. ولاردىڭ كەيبىرەۋلەرى ۇزاق مەرزىمدى ساقتاۋدا بولسا، قالعاندارى اسكەريلەردىڭ قاراماعىندا بولعان. ولاردى قالپىنا كەلتىرۋ جانە جاڭعىرتۋ جۇمىستارىمەن رەسەيلىك جانە قازاقستاندىق كومپانيالار اينالىستى.
مارات امانجولوۆ، گرانيت زاۋىتىنىڭ تەحنيكالىق ديرەكتورىنىڭ ورىنباسارى:
- ارينە، قازاقستاننىڭ قارۋلى كۇشتەرى ۇزدىكسىز دامۋ جولىندا. قازىر جاڭادان شىعىپ جاتقان بۋك جانە تور دەگەن كومپلەكستەردى قازاقستان قارۋلى كۇشتەرى ساتىپ الىپ جاتىر. سونى ارى قاراي تەكسەرۋ جانە جوندەۋ الماتىنىڭ گرانيتىندا وتەدى. 25 جىل كۇزەتتە تۇرسا، سول 25 جىل بويى ءبىزدىڭ ماماندار بارىپ، تەكسەرىپ، سىنعان جەرلەرىن جوندەپ بەرەدى. اسكەرلەرىمىزگە سونداي كومەك كورسەتەمىز. قازىرگى ۋاقىتتا ەلىمىزدە Бук-М2 ديۆيزيوندىق جيىنتىعى قىزمەت ەتۋدە.
قورعانىس مينيسترلىگى ونىڭ ەكىنشىسىن ساتىپ الۋ تۋرالى شەشىم قابىلدادى. Toр-M2 ەلىمىزگە 2022 - جىلدىڭ باسىندا كەلەدى. ال ونىڭ اسكەري سىناقتارى سارىشاعان پوليگونىندا وتەدى.
