پەتروپاۆلدا زاڭسىز پايدالانۋعا بەرىلگەن 300-دەن استام جەر ۋچاسكەسى انىقتالدى

سونىڭ 75- ءى سوت ارقىلى مەملەكەت مەنشىگىنە قايتارىلدى، دەپ حابارلايدى قازاقپارات ءتىلشىسى.

بۇگىن پەتروپاۆل اكىمى بولات جۇمابەكوۆ وڭىرلىك كوممۋنيكاتسيالار قىزمەتىندە بريفينگ وتكىزىپ، وتكەن جىلدى قورىتىندىلادى، بيىلعى جىلدىڭ جوسپارلارىمەن ءبولىستى. اتقارىلعان جۇمىستاردىڭ ءبىرى - پەتروپاۆل اۋماعىندا بوس جاتقان جەرلەردى انىقتاۋ.

«سوڭعى ءۇش جىلدىڭ ىشىندە 75 ۋچاسكە قايتارىلدى. جالپى تەكسەرۋ بارىسىندا زاڭسىز بەرىلگەن 316 ۋچاسكە انىقتالدى. بۇدان باسقا بوس جاتقان ساياجايلاردى انىقتاۋ ماقساتىندا دا جۇمىستار جۇرگىزىلىپ جاتىر. سوڭعى جىلدارى تۇرعىندار تاراپىنان ساياجاي ۋچاسكەلەرىنە سۇرانىس ارتقان. بوس جاتقاندارى ەسەپكە الىنادى. كەيىن ونى اكىمدىك ارقىلى زاڭدى تۇردە پايدالانۋعا الۋعا بولادى»، - دەيدى بولات جۇمابەكوۆ.

جىل باسىنان بوس جاتقان 176 ساياجاي ۋچاسكەسى انىقتالعان، ولاردىڭ 125- ءى يەسىز مۇلىك رەتىندە ەسەپكە الىندى. اۋلالارعا رۇقساتسىز قويىلعان گاراجدار دا الىنىپ جاتىر.

«اۋلالاردا تۇرعان گاراجدار بويىنشا تۇرعىنداردان كوپ ءوتىنىش تۇسەدى. بىزدەن ولاردى باسقا جاققا كوشىرىپ، ورىندى بوساتۋىمىزدى سۇرايدى. اۋلالاردى جوندەۋ كەزىندە دە بۇل ماسەلەگە تاپ بولىپ جاتىرمىز. قازىر پەتروپاۆلدا 1419 گاراج زاڭسىز تۇر. يەلەرىنىڭ ولاردى قويۋعا رۇقساتى جوق. بىلتىر ولاردىڭ 253- ءى بۇزىلسا، بيىل 121- ءى باسقا ورىنعا كوشىرىلدى. پەتروپاۆلداعى «پرومىشلەننايا كوشەسىندە 600 گاراج سىياتىن ورىن ازىرلەدىك»، - دەيدى پەتروپاۆل اكىمى.

اۆتور: اقەركە داۋرەنبەك قىزى