بۇرىنعى جەمقورلاردى جۇمىسقا قابىلداعان ادامعا 300 مىڭ تەڭگە ايىپپۇل سالىنادى
بۇل جونىندە ق ر سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ءبىرىنشى ورىنباسارى ولجاس بەكتەنوۆ ارنايى بريفينگ بارىسىندا ءمالىم ەتتى.
«بۇل جەردە ماڭىزدى ماسەلە - سىبايلاس جەمقورلىق قىلمىسىن جاساعان ادامداردى جۇمىسقا ورنالاستىرۋعا تىيىم سالۋ تۋرالى تالاپ بۇعان دەيىن تەك مەملەكەتتىك قىزمەت پەن كۆازيمەملەكەتتىك سەكتوردىڭ باسشى لاۋازىمدارىنا قاتىستى بولعانىن اتاپ وتكىم كەلەدى. ەندى بيىل جىل باسىنان باستاپ كۇشىنە ەنگەن ەڭبەك كودەكسىنە ەنگىزىلگەن تۇزەتۋلەرگە سايكەس سىبايلاس جەمقورلىق ءۇشىن سوتتالعان ادامداردى كەز كەلگەن كۆازيمەملەكەتتىك سەكتور لاۋازىمىنا قابىلداۋعا تولىق تىيىم سالىندى»، - دەدى سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ءبىرىنشى ورىنباسارى ولجاس بەكتەنوۆ.
ايتا كەتەيىك، بريفينگتە بەكتەنوۆ قازاقستان رەسپۋبليكاسىنىڭ اكىمشىلىك قۇقىق بۇزۋشىلىقتار تۋرالى كودەكسىنە ەنگىزىلگەن وزگەرىستەر تۋرالى ايتتى.
«20- ناۋرىزدا مەملەكەت باسشىسى «قازاقستان رەسپۋبليكاسىنىڭ اكىمشىلىك قۇقىق بۇزۋشىلىقتار تۋرالى كودەكسىنە وزگەرىستەر ەنگىزۋ تۋرالى» زاڭعا قول قويدى. زاڭ ءساۋىردىڭ 5-ىنەن باستاپ قولدانىسقا ەنگىزىلدى. اتالعان زاڭ اياسىندا اكىمشىلىك سىبايلاس جەمقورلىق قۇقىق بۇزۋشىلىقتار تۋرالى حاتتامالار جاساۋ قۇزىرەتى سىبايلاس جەمقورلىققا قارسى قىزمەتكە بەكىتىلدى. اكىمشىلىك قۇقىق بۇزۋشىلىقتاردىڭ جولىن كەسۋ - جەمقورلىق كورىنىستەرىنىڭ الدىن الۋدىڭ ءتيىمدى قۇرالى. اگەنتتىكتىڭ ءتيىستى فۋنكتسياسى مەملەكەت باسشىسىنىڭ جارلىعىمەن بەكىتىلگەن ەرەجەدە دە كوزدەلگەن»، - دەدى سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ءبىرىنشى ورىنباسارى.
