ەلوردادا قارجى پيراميداسىن ۇيىمداستىرىپ، 300 ادامدى الداعان ايەل ۇستالدى

نۇر- سۇلتان. قازاقپارات - ەلوردالىق پوليتسەيلەر «رەالنىە دوحودى» اتتى ەكى قارجى پيراميداسىن ۇيىمداستىرۋشىلارىنىڭ ءبىرىن ۇستادى، دەپ حابارلايدى قازاقپارات.

45 جاستاعى ايەلگە قاتىستى قارجى پيراميداسىن ۇيىمداستىردى دەگەن كۇدىكپەن قىلمىستىق ءىس قوزعالدى. ول 2019 -جىلدىڭ مامىرىنان باستاپ قارجى پيراميداسىن باسقارىپ، ەلوردا تۇرعىندارى مەن ەلىمىزدىڭ باسقا وڭىرلەرىنىڭ ازاماتتارىنان الاياقتىق جولمەن اسا ءىرى كولەمدە اقشا العان. انىقتالعانداي، كۇدىكتى WhatsApp مەسسەندجەرىندە «رەالنىە دوحودى 1» جانە «رەالنىە دوحودى 2» اتتى ەكى چات اشىپ، سالىمشىلارعا باسقا بيزنەس جوبالاردا جوعالتقان اقشاسىن قايتارۋعا ۋادە ەتكەن.

ادامدار 20 مىڭ جانە ودان دا كوپ كولەمدە اقشا سالىپ، 15 كۇننىڭ ىشىندە تابىسىن %100 قايتارىپ الۋعا ۇمىتتەنگەن. قازىرگى ۋاقىتتا پوليتسياعا 40 تان استام زارداپ شەككەن سالىمشى شاعىم تۇسىرگەن. سوتقا دەيىنگى تەرگەۋ بارىسىندا الاياقتىڭ ارەكەتىنەن ەلىمىزدى ءارتۇرلى وڭىرىندە تۇراتىن 300 دەن استام ادامنىڭ زارداپ شەككەنى انىقتالدى. اتالعان فاكتى بويىنشا ق ر ق ك 217-بابى بويىنشا سوتقا دەيىنگى تەرگەۋ جۇمىستارى ءجۇرىپ جاتىر، كۇدىكتى تەرگەۋ يزولياتورىنا قامالدى.