اقتوبەدە 300 دەن استام وتباسى زاڭسىز اتاۋلى الەۋمەتتىك كومەك العان

اقتوبە قالاسىندا تابىسىن جاسىرىپ، اتاۋلى الەۋمەتتىك كومەكتى العان 334 وتباسى انىقتالدى. ولار 24 ميلليون تەڭگەنى كەرى قايتاردى.

«ءۇيىم جوق، 6 بالام بار، مەملەكەتتەن كومەك كەرەك دەپ ءبىر ايەل ارىز جازعان بولاتىن. كورسەتكەن مەكەنجايىنا بارعاندا دەرەك راستالدى. سوندىقتان وعان اتاۋلى الەۋمەتتىك كومەك تاعايىندالدى. كەيىن دەپۋتاتتار وتكىزگەن قوعامدىق قابىلداۋدا ول بايقاۋسىزدا 11 ىقشام اۋدانداعى ءۇيىنىڭ مەكەنجايىن جازعان. ءۇي اۋلاسىندا 2 كاماز، 1 جەڭىل كولىك، ەكىقاباتتى ءۇي، دۇكەن تۇر ەكەن»، - دەيدى قالالىق جۇمىسپەن قامتۋ جانە الەۋمەتتىك باعدارلامالار ءبولىمىنىڭ باسشىسى ماقپال تۇرماعامبەتوۆا.

تاعى ءبىر اقتوبەلىك ەكى مەكەنجاي بويىنشا اتاۋلى الەۋمەتتىك كومەك الىپ وتىرعان. ول العا اۋداندىق جانە اقتوبە قالالىق جۇمىسپەن قامتۋ بولىمىنە قۇجاتتار تاپسىرعان. زاڭسىزدىق انىقتالىپ، وتباسى 468 مىڭ تەڭگەنى كەرى قايتاردى.

«ءبىر توقسان بويى 70 كە جۋىق كاسىپكەر تابىسىن جاسىرىپ، جاردەماقى الىپ وتىردى. بارلىعى ءوز ەرىكتەرىمەن بيۋجەت قارجىسىن كەرى قايتاردى»، - دەدى ماقپال تۇرماعامبەتوۆا.