10:11, 31 - ناۋرىز 2019 | GMT +6
تۇركىستاندا 300 مىڭنان استام قىزعالداق گۇلدەپ تۇر
تۇركىستان. قازاقپارات - تۇركىستاندا 300 مىڭنان استام قىزعالداق گۇلدەپ تۇر، دەپ حابارلايدى تۇركىستان وبلىسى اكىمدىگىنىڭ باسپا ءسوز قىزمەتى.
باسپا ءسوز قىزمەتىنىڭ حابارلاۋىنشا، وتكەن جىلدىڭ جەلتوقسان ايىندا وبلىس ورتالىعى تۇركىستاندا قىزعالداقتىڭ 3 تۇرىنەن 300000 نان استام ءتۇپ وتىرعىزىلعان. قازىرگى تاڭدا جاپىراق جايىپ، تولىق گۇلدەگەن قىزعالداق قالانىڭ كوركىن اشا تۇسكەن. ال قىزىل گۇلدەر قالاداعى الماتى الاڭىنا جانە ب. ساتتارحانوۆ داڭعىلى مەن ءامىر تەمىر، تىنىشتىقۇلوۆ كوشەلەرىنىڭ بويى مەن قوجا احمەت ياساۋي مەشىتىنىڭ ماڭايىنا وتىرعىزىلعان.
سونداي-اق، ءساۋىر- مامىر ايلارىندا قالاعا 350000 ءتۇپ ساندىك دەكوراتيۆتى گۇل تۇرلەرىن وتىرعىزۋ جوسپارلانىپ وتىر.
قوسىمشا قالا تازالىعىن قامتاماسىز ەتۋ ماقساتىندا سەنبىلىكتەر ۇيىمداستىرىلىپ، قالاداعى مەكەمەلەردىڭ قىزمەتكەرلەرى مەن ۇكىمەتتىك ەمەس ۇيىمداردىڭ مۇشەلەرى ءوز ۇلەستەرىن قوسىپ، اعاش وتىرعىزۋعا اتسالىسۋدا.
