تۇركىستانعا ءۇش ايدا 300 مىڭعا جۋىق تۋريست كەلگەن
ونىڭ ىشىندە بەس مىڭعا جۋىعى شەتەل ازاماتتارى. بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە تۇركىستان قالاسىنىڭ اكىمى تاجىبەك مۇسايەۆ ءمالىم ەتتى، دەپ حابارلايدى قازاقپارات ءتىلشىسى.
كيەلى شاھار اكىمىنىڭ سوزىنشە، تۋريزم سالاسىندا 1 ميلليارد 689,3 ميلليون تەڭگە تابىس ءتۇسىپ، قالا ەكونوميكاسىنىڭ ۇلعايۋىنا ۇلەسىن قوسقان.
ال، وتكەن جىلى قاسيەتتى قالاعا 1 ميلليونعا تارتا تۋريست كەلدى. قازىرگى تاڭدا قالا حالقىنىڭ سانى 263 مىڭنان اسادى. تاجىبەك مۇسايەۆ بۇدان وزگە جىل باسىنان بەرى شاعىن جانە ورتا كاسىپكەرلىكپەن اينالىساتىن 13405 سۋبەكت تىركەلگەنىن اتاپ ءوتتى.
«بۇگىنگى تاڭدا ناقتى جۇمىس ىستەپ تۇرعان بەلسەندى كاسىپكەرلىك نىساندارىنىڭ سانى 13 مىڭنان اسسا، جۇمىسپەن قامتىلعان ادامدار 34 مىڭدى قۇراپ وتىر. ال، اتالعان سالاداعى ءونىم كولەمى 19648,9 ميلليون تەڭگەگە جەتكەن. قالاداعى ءونىم كولەمى 2,6 پايىزعا ارتىپ وتىر»، - دەدى تاجىبەك قالمان ۇلى.
