تالدىقورعاندا ورتەنگەن ساۋدا ورتالىعىنان 300 دەن استام ادام ەۆاكۋاتسيالاندى
«شىعىن كولەمى انىقتالۋدا. ءورتتىڭ نەدەن شىققانى بەلگىسىز»، دەدى وبلىستىق ءى ى د باسپا ءسوز قىزمەتىنىڭ وكىلى ازامات جۇرتبايەۆ.
ەستەرىڭىزگە سالا كەتەيىك، بۇگىن ساعات 12:55 ت ج د ساۋدا كەشەنىنىڭ ورتەنىپ جاتقاندىعى جونىندە حابارلاما كەلىپ تۇسكەن. جالىندى سوندىرۋگە تالدىقورعانمەن قاتار جاقىن ماڭداعى اۋدانداردىڭ قۇتقارۋشىلارى دا جۇمىلدىرىلدى. 14:40 مينۋتتا ءورت تولىقتاي اۋىزدىقتالدى. قازىر «قاراعاش» ساۋدا ورتالىعىنىڭ ماڭى ساۋداگەرلەرگە تولى. ولاردىڭ ءبىرازى زاتتارىن شىعارىپ، ارى- بەرى تاسىپ الەك. كەيبىر ساۋداگەرلەر قۇجاتتارىنىڭ دا ورتەنىپ كەتكەنىن ايتۋدا. ال تالدىقورعان قالاسىنىڭ اكىمدىگى وسى الاپات ءورت بويىنشا ارنايى كوميسسيا قۇرالاتىنىن ايتتى.
ايتا كەتۋ كەرەك، «قاراعاش» ساۋدا ورتالىعى وسىدان تۋرا 10 جىل بۇرىن ورتەنگەن بولاتىن. ول كەزدە ءتىلسىز جاۋ 2500 شارشى مەتر جەردى كۇلگە اينالدىرعان ەدى.
اۆتور: سامال قابىشيەۆا
