پاۆلودار وبلىسىندا تۇڭعىش پرەزيدەنت كۇنى قارساڭىندا 300 دەن استام شارا وتەدى
بۇل تۋرالى وبلىس اكىمدىگىندە وتكەن اپپاراتتىق جيىن بارىسىندا ىشكى ساياسات باسقارماسىنىڭ باسشىسى ەرنۇر داۋەنوۆ ايتتى.
1- جەلتوقساندا وڭىردە الەۋمەتتىك-وندىرىستىك ماڭىزى بار نىساندار قولدانىسقا بەرىلەدى. ناقتىراق ايتساق، پاۆلوداردا قوسپالى اليۋميني شىعاراتىن «Guissenhaus» ج ش س ءوندىرىس ورنىن ىسكە قوسۋ، «سارىارقا» شاعىن اۋدانىندا تۇرعىن ءۇيدى قولدانىسقا بەرۋ جوسپارلانىپ وتىر.
ەكىباستۇزدا ەنەرگەتيكتەر كوشەسىندە كوپقاباتتى تۇرعىن ءۇيدىڭ كىلتتەرىن تابىستاپ، قىزاناق ءوسىرۋ بويىنشا جىلىجاي، شارباقتى اۋدانىندا قايتا قۇرۋدان كەيىن مەملەكەتتىك تىلدە ءتالىم-تاربيە بەرەتىن 60 ورىنعا شاقتالعان بالاباقشا، ۋسپەن اۋدانى تاۆولجان اۋىلىندا مەديتسينالىق پۋنكتى، جەلەزين اۋدانىنىڭ جەلەزين اۋىلىندا قايتا قۇرۋدان كەيىن 10 پاتەرلىك جاتاقحانا، مەرعالىم ەلدى مەكەنىندە ءانشى روزا مۇقاتايەۆانىڭ قاتىسۋىمەن كلۋب اشىلادى.
باياناۋىل اۋدانىندا «بايان سۇلۋ - قوزى كورپەش» جانە «ماڭگىلىك ەل» اللەيالارى، ەكى پاتەرلى ءتورت ءۇي، قايتا قۇرۋدان كەيىن اۋداندىق ستاديون تاپسىرىلادى. بۇدان باسقا، «رۋحاني جاڭعىرۋ» باعدارلاماسى اياسىندا «مەنىڭ تابىسىم - ەلىمنىڭ تابىسى» اتتى دارىندى جاستاردىڭ وبلىستىق كونكۋرسى، كاسىپكەرلىك يدەيالار مەن ستارتاپتار جارمەڭكەسى ۇيىمداستىرىلادى».
وبلىستىق مادەنيەت، مۇراعاتتار جانە قۇجاتتاما باسقارماسىنىڭ باسشىسى ارداق رايىمبەكوۆتىڭ ايتۋىنشا، 14- قاراشا كۇنى ەستاي اتىنداعى مادەنيەت سارايىندا قازاقستان ەستراداسىنىڭ جۇلدىزى قايرات نۇرتاستىڭ كونتسەرتى، 26- قاراشا كۇنى يسا بايزاقوۆ اتىنداعى وبلىستىق فيلارمونيادا رۇستەمبەك وماروۆ اتىنداعى قازاق ۇلتتىق اسپاپتارى وركەسترىنىڭ «ۇلى دالا سارىنى» كونتسەرتى وتەدى.
27-28- قاراشا كۇندەرى الماتى قالاسى «وتىرار سازى» وركەسترىنىڭ گاسترولدىك ساپارى ۇيىمداستىرىلادى. نەگىزگى سالتاناتتى شارالار 29 -قاراشا كۇنى ساعات 15.00 دە ەستاي اتىنداعى مادەنيەت سارايىندا، 30- قاراشادا اۋداندار مەن قالالاردا وتەدى.
- پاۆلودارلىقتار مەن قالا قوناقتارى «ەلباسى پاۆلودار وبلىسىندا» فوتوكورمەسىن تاماشالاي الادى، - دەيدى ارداق رايىمبەكوۆ.
- رۇستەمبەك وماروۆ اتىنداعى قازاق ۇلتتىق اسپاپتار وركەسترى، انەل ارىنوۆا مەن «شاميل» توبى ەلباسىنىڭ ءسۇيىپ تىڭدايتىن اندەرىن ورىندايدى. سونىمەن قاتار، پاۆلودار ساحناسىندا العاش رەت استانالىق «قاسيەت» توبىنىڭ جانە ايبەك بەكبوسىنوۆتىڭ ورىنداۋىندا «ەلباسى تولعاۋى» كۇيىنىڭ تۇساۋى كەسىلەدى.
الماتىدان تەرمەشى تاتيانا بۋرميستروۆا جانە ق ر حالىق ءارتىسى، مەملەكەتتىك سىيلىقتىڭ، قازاقستان جاستار وداعى سىيلىعىنىڭ، قىرعىزدىڭ ابىلاس مولدابايەۆ اتىنداعى حالىقارالىق سىيلىقتارىنىڭ لاۋرەاتى نۇرعالي ءنۇسىپجانوۆ شاقىرىلىپ وتىر.
وبلىس اكىمى بولات باقاۋوۆ تۇڭعىش پرەزيدەنت كۇنى قارساڭىندا نىسانداردىڭ اشىلۋىن بالكىم ءبىر كۇندە وتكىزۋ تۋرالى ۇسىنىس ءبىلدىردى.
«مەرەكە قارساڭىندا قالالار مەن اۋدانداردىڭ اكىمدەرى، مەملەكەتتىك ورگانداردىڭ باسشىلارى جۇمىستا جوعارى جەتىستىك كورسەتكەن قىزمەتكەرلەردى ىنتالاندىرۋ جانە سىياقى بەرۋدى قاراستىرۋى قاجەت. سونىمەن قاتار، كاسىپكەرلىك، ساۋدا جانە تۋريزم باسقارماسى مەرەكەلىك جەڭىلدىكتەر بويىنشا اكتسيالار مەن جارمەڭكەلەر ۇيىمداستىرعانى ءجون»، - دەگەن ايماق باسشىسى مەرەكەلەرگە دايىندىق ساپاسىن جەكە باقىلاۋعا الۋدى ءوزىنىڭ ورىنباسارى مەيرام بەگەنتايەۆقا تاپسىردى.
