استانادا جاستاردىڭ سانى 300 مىڭعا جۋىقتادى
بۇل تۋرالى استانا قالاسى جاستار ساياساتى ماسەلەلەرى جونىندەگى باسقارمانىڭ باسشىسى اسحات ورالوۆ ءمالىم ەتتى، دەپ حابارلايدى قازاقپارات elorda.info سايتىنا سىلتەمە جاساپ.
اسحات ورالوۆتىڭ ايتۋىنشا، باسقارما تاراپىنان جاستاردى مەملەكەتتىك قولداۋ شارالارى مەن ولاردى ەلوردانىڭ قوعامدىق ومىرىنە تارتۋ جۇمىسى قولعا الىنعان.
بۇل جۇمىس جەتى باعىت بويىنشا جۇرگىزىلۋدە. جاستارعا كاسىبي باعدار بەرىپ، جۇمىسقا ورنالاستىرۋعا جاردەم كورسەتۋ قازىرگى تاڭداعى وزەكتى ماسەلەلەردىڭ ءبىرى. بۇل كۇندەرى ەلىمىزدە ءارتۇرلى تەحنيكالىق ماماندار تاپشى ەكەنى ءمالىم.
وسى ولقىلىقتىڭ ورنىن تولتىرۋ ماقساتىندا استانا جاستارىنا جىل سايىن قالا كاسىپورىندارىنا ەكسكۋرسيالار ۇيىمداستىرىلۋدا. ماسەلەن، بىلتىر «سەسنا-استىق» كونسەرنى» ا ق، «تۇلپار- تالگو» ج ش س، «ستالتسينك» زاۋىتى، «تسەلينگيدروماش» كومپانياسى سىندى كاسىپورىنداردى 5500 جاس ارالادى.
بيىل بۇل جۇمىس شيراتىلىپ، اتالمىش ءوندىرىس وشاقتارىندا 12 مىڭ جاس بولدى. بۇعان قوسا، جۇمىسشى ماماندىقتاردى ناسيحاتتاۋ، سۇرانىسقا يە ماماندىق يەلەرىمەن كەزدەسۋلەردى ۇيىمداستىرۋ، كاسىبي باعدار بەرۋ ماقساتىندا جوعارى سىنىپ وقۋشىلارىنىڭ اتا-انالارىمەن جۇمىس جۇرگىزۋ قولعا الىنعان. باسقارمادان ءمالىم ەتكەندەي، قازىر ەڭبەك نارىعىندا ينجەنەر-مەحانيك، ەلەكترشى، مونتاجشى، سانتەحنيك، سلەسار، سونداي-اق دەنساۋلىق ساقتاۋ، ءبىلىم بەرۋ، قىزمەت كورسەتۋ سالالارىنىڭ ماماندارى سۇرانىسقا يە.
بالالار مەن جاستاردىڭ دەمالىسىن ۇيىمداستىرۋ مەن سوعان جاعداي جاساۋ، شىعارماشىل جاستاردى جانە جاستاردىڭ باستامالارىن قولداۋ، جاستاردىڭ اراسىندا قۇقىق بۇزۋشىلىقتىڭ الدىن الۋ، الەۋمەتتىك ءالسىز توپتارعا جاتاتىن جاستارعا كومەك بەرۋ، ۆولونتەرلىك قوزعالىستى دامىتۋ سىندى جۇمىستار ءبىر-بىرىمەن ساباقتاسىپ جاتىر. سونداي-اق، «رۋحاني جاڭعىرۋ» باعدارلاماسىنىڭ اياسىندا دا ءبىرقاتار شارالار اتقارىلۋدا.
ەلوردادا جاستار ساياساتى ماسەلەلەرى جونىندەگى باسقارماعا قاراستى 18 اۋلا كلۋبى جۇمىس ىستەپ تۇر. الماتى اۋدانىندا - 10، سارىارقا اۋدانىندا - 5 جانە ەسىل اۋدانىندا - 3. الداعى ۋاقىتتا تاعى 6 كلۋبتىڭ اشىلۋى جوسپارلانعان. باسقارما باسشىسىنىڭ سوزىنشە، سپورتتىق نىساندارمەن استانانىڭ شەتكى ايماقتارىن دا قامتۋ ويلاستىرىلعان.
«قالادا جاستار ساياساتىن جۇزەگە اسىرۋدىڭ ماڭىزدى باعىتتارىنىڭ ءبىرى - ستۋدەنتتەر مەن جۇمىسشى جاستاردى بىرىكتىرۋ. بۇل ماقساتتا اعىمداعى جىلدىڭ باسىنان جوعارى وقۋ ورىندارىنداعى جاستار ءىسى جونىندەگى كوميتەت كوشباسشىلارىن جانە ەلوردانىڭ بارلىق ستۋدەنتتەرىن بىرىكتىرەتىن «ا14» الاڭى قۇرىلدى. مۇنداعى «ا» - استانانى، 14 - ەلوردانىڭ جوعارى وقۋ ورىندارىنىڭ سانىن بىلدىرەدى. وسى جۇمىس بارىسىندا اي سايىن رەسمي، بەيرەسمي كەزدەسۋلەردى ۇيىمداستىرامىز. بۇل ارقىلى استاناداعى جوعارى وقۋ ورىندارىندا وقيتىن 51 مىڭ ستۋدەنتتىڭ جاعدايىن ءبىلىپ وتىرامىز»، - دەيدى اسحات ورالوۆ.
وسى ۇلگىمەن قالانىڭ كوللەدج ستۋدەنتتەرىنىڭ باسىن قوساتىن «ا35»، مەكتەپ كوشباسشىلارىنان قۇرالعان «ا84» الاڭدارى قۇرىلدى. بۇل الاڭداردىڭ جۇمىسى وتكەن قىركۇيەك ايىندا باستالدى.
