الماتىدا جاڭا جىل قارساڭىندا 300 وتباسىنا الەۋمەتتىك كومەك كورسەتىلدى

الماتى. قازاقپارات- بۇگىن الماتى قالاسىنىڭ تاستاق بازارىندا ق ر تاۋەلسىزدىك كۇنى جانە كەلە جاتقان جاڭا جىل مەرەكەسىنە وراي، قايىرىمدىلىق اكسياسى ءوتتى.

وندا ۇلى وتان سوعىسىنىڭ ارداگەرلەرىنە، زەينەتكەرلەرگە، جالعىز باستى انالارعا، الەۋمەتتىك تۇرمىسى تومەن، كوپ بالالى جانە مۇگەدەك بالالارى بار وتباسىلارىنا 300 الەۋمەتتىك پاكەت، ياعني ازىق- تۇلىك سەبەتى تاراتىلدى.

ۇيىمداستىرۋشىلاردىڭ ايتۋىنشا، ءبىر ازىق- تۇلىك سەبەتىنە ءبىر-ءبىر كەلىدەن قانت، ۇن، كەسپە، كۇرىش، قاراقۇمىق، ءبىر ليتر كۇنباعىس مايى مەن ءسۇت، ءبىر قوراپشا شاي جانە ءبىر بولكە نان سالىندى. جالپى سوماسى 2 مىڭ تەڭگەدەن استام.

بۇگىنگى قايىرىمدىلىق شاراسىنا قاتىسقان «تاستاق-1»، «تاستاق-2» جانە «تاستاق-3» شاعىن اۋداندارىنىڭ تۇرعىندارى ۇيىمداستىرۋشىلار - المالى اۋدانىنىڭ اكىمدىگى مەن «تاستاق» بازارىنىڭ باسشىلىعىنا ريزاشىلىقتارىن ءبىلدىردى.

اۆتور: جاپپاربەرگەن ايبوتا