استانادا كورۋ قابىلەتى بۇزىلعان 300 گە جۋىق ادام ينۆاتاكسي قىزمەتىن پايدالانۋدا

استانا. قازاقپارات - دۇنيەجۇزىلىك دەنساۋلىق ساقتاۋ ۇيىمىنىڭ شەشىمىمەن 13 -قاراشا حالىقارالىق زاعيپتار كۇنى دەپ جاريالاندى.

ءدال وسى كۇنى پاريجدە جانە پەتەربوردا زاعيپتارعا ارناپ مەكتەپتەر مەن كاسىپورىندار اشقان فرانسۋز پەداگوگى ۆالەنتين گايۋي دۇنيەگە كەلگەن.

قازىرگى تاڭدا استانادا مۇمكىندىگى شەكتەۋلى 12585 ادام تىركەلگەن، ولاردىڭ اراسىندا كورۋ ورگاندارىنىڭ قىزمەتى بۇزىلعان ادامدار دا بار. ونداي ازاماتتاردىڭ ءبىر بولىگى «قازاق زاعيپتار قوعامى» ق ب استانالىق فيليالىنان كومەك سۇرايدى. قازىر قوعامداعىلاردىڭ قامقورلىعىندا 450 ادام بار، ولاردىڭ 65 پايىزىنان استامى ەگدە جاستاعىلار بولىپ تابىلادى.

استانادا مۇمكىندىكتەرى شەكتەۋلى ادامدارعا ارناپ قالادا قولايلى ورتا قۇرۋ بويىنشا كەشەندى جۇمىستار جۇرگىزىلۋدە. كوشەلەردىڭ قيىلىستارى مەن كوشەلەردە دىبىستىق سينگالدارى بار باعدارشامدار قولدانىلادى، ولار كوزدەرى ناشار كورەتىن ادامداردىڭ جولدان وتۋىنە كومەكتەسەدى.

جولدان ءوتۋ قولايلى بولۋى ءۇشىن كورۋ قابىلەتى بويىنشا 1- توپتاعى 294 مۇگەدەك جان ينۆاتاكسي قىزمەتىن(مەملەكەتتىك الەۋمەتتىك تاپسىرىس شەڭبەرىندە مۇگەدەكتەردى تاسىمالداۋ بويىنشا الەۋمەتتىك قىزمەتتەردى كورسەتۋگە ارنالعان اۆتوموبيل - رەد.) پايدالانادى. بۇدان بولەك، استانادا بىلتىرعى جىلدان باستاپ № 23 -بالاباقشا نەگىزىندە ناشار كورەتىن جانە مۇلدەم كورمەيتىن زاعيپ بالالار ءۇشىن ارنايى توپ جۇمىس جاسايدى. قازىر توپتا التى بالا بار، ولارمەن بىلىكتى تاربيەشىلەر، دەفەكتولوگتار، لوگوپەدتەر جانە تيفلوگوپەداگوگتەر جۇمىس جاسايدى.

كورۋ قابىلەتتەرىن بۇزىلعان ازاماتتاردى مۇمكىندىگىنشە كوبىرەك جۇمىسقا تارتۋ ءۇشىن ءبىلىم بەرۋگە كوپ كوڭىل بولىنەدى. استانادا مەديتسينالىق كوللەدجدە بيكە ءىسىن وقىتۋ بويىنشا پيلوتتىق جوبا ىسكە قوسىلدى، وعان كورۋ قابىلەتى بويىنشا 16 مۇگەدەك جان ءتۇستى.

كورۋ قابىلەتتەرى بۇزىلعان ادامدار «قازاقستان زاعيپتار قوعامى» ق ب استانالىق فيليالىنا 44-95-26 تەلەفونى بويىنشا حابارلاسا الاتىنىن ەستەرىڭىزگە سالامىز، دەپ جازادى ەلوردانىڭ رەسمي سايتى.