15:21, 21 - تامىز 2015 | GMT +5
پروكۋراتۋرانىڭ ارالاسۋىمەن 300 دەن استام جۇمىسشىنىڭ جالاقىسى وتەلدى
كوكشەتاۋ. قازاقپارات - اقمولا وبلىسىندا پروكۋراتۋرانىڭ ارالاسۋىمەن 300 دەن استام جۇمىسشىنىڭ قوردالانىپ قالعان جالاقىسى وتەلدى.

بۇل تۋرالى وبلىستىق پروكۋراتۋرانىڭ باسپا ءسوز قىزمەتىنەن حابارلادى.
«شورتاندى اۋداندىق پروكۋراتۋراسى جۇرگىزگەن تەكسەرىس بارىسىندا بارايەۆ اتىنداعى استىق شارۋاشىلىعى عىلىمي- وندىرىستىك ورتالىعىنىڭ 303 جۇمىسشىنىڭ الدىندا ەڭبەكاقى بويىنشا 20,8 ميلليون تەڭگە قارىزى قوردالانىپ قالعانى انىقتالدى.
وسىعان وراي پروكۋراتۋرانىڭ ارالاسۋىمەن اتالعان ورتالىق ءساۋىر ايىنان باستاپ قوردالانىپ قالعان جۇمىسشىلارىنىڭ جالاقىسىن وتەۋگە ءماجبۇر بولدى. قازىرگى كەزدە ورتالىق بارلىق جۇمىسشىلارىمەن تولىق ەسەپ ايرىستى»، دەپ كورسەتىلگەن حابارلامادا.
اۆتور: اسلان وسپانوۆ